ఖాళీ కడుపుతో వాకింగ్.. నిజంగా మంచిదేనా?

దేశవ్యాప్తంగా వేసవి ఉష్ణోగ్రతలు రోజు రోజుకూ పెరుగుతున్నాయి. ఉదయం నుంచే ఎండ తీవ్రత కనిపిస్తున్న నేపథ్యంలో చాలా మంది తమ రోజువారీ వాకింగ్ సమయాన్ని ముందుకు జరుపుతున్నారు. బరువు తగ్గడం, ఫిట్‌గా ఉండడం కోసం ఉదయాన్నే నడకకు వెళ్లడం మంచి అలవాటు అయినప్పటికీ, ఖాళీ కడుపుతో వాకింగ్ చేయడం ఎంతవరకు సురక్షితం అన్న సందేహం చాలామందిలో ఉంది.

వైద్య నిపుణుల అభిప్రాయం ప్రకారం, ఖాళీ కడుపుతో నడక చేయడం ప్రతి ఒక్కరికీ సరిపోదు. శరీర పరిస్థితి బాగున్నవారు, ఎలాంటి ఆరోగ్య సమస్యలు లేనివారు మాత్రమే ఇలా చేయవచ్చు. కానీ వాకింగ్ సమయంలో లేదా తర్వాత తల తిరగడం, అలసట, బలహీనత వంటి లక్షణాలు కనిపిస్తే, అది శరీరానికి ఒత్తిడిగా మారినట్టు భావించాలి. అలాంటి సందర్భాల్లో వెంటనే ఆపడం, అవసరమైతే వైద్యులను సంప్రదించడం అవసరం.

ముఖ్యంగా మధుమేహంతో బాధపడుతున్న వారు ఖాళీ కడుపుతో వ్యాయామం చేయడం విషయంలో జాగ్రత్తగా ఉండాలి. ఏమీ తినకుండా నడకకు వెళ్లడం వల్ల రక్తంలో చక్కెర స్థాయిలు ఒక్కసారిగా పడిపోయే ప్రమాదం ఉంటుంది. అందుకే వాకింగ్‌కు వెళ్లే ముందు తేలికపాటి ఆహారం తీసుకోవడం, ఉదాహరణకు నానబెట్టిన శనగలు లేదా ప్రోటీన్ ఉన్న పదార్థాలు తీసుకోవడం మంచిదని నిపుణులు సూచిస్తున్నారు.

వేసవి కాలంలో మరో ముఖ్యమైన సమస్య డీహైడ్రేషన్. ఎక్కువగా చెమట పడటం వల్ల శరీరంలో నీటి శాతం తగ్గిపోతుంది. ఈ పరిస్థితిలో ఖాళీ కడుపుతో వాకింగ్ చేస్తే తలనొప్పి, కండరాల నొప్పులు, నీరసం వంటి సమస్యలు వచ్చే అవకాశాలు ఎక్కువగా ఉంటాయి. కాబట్టి నడకకు వెళ్లే ముందు తగినంత నీరు తాగడం, అవసరమైతే ఎలక్ట్రోలైట్స్ తీసుకోవడం ఉపయోగకరం.

ఇక సమయాన్ని కూడా సరైన విధంగా ఎంచుకోవడం కీలకం. ఉదయం సూర్యకిరణాలు వేడెక్కే ముందు, సాధ్యమైనంత త్వరగా వాకింగ్ పూర్తి చేయడం మంచిది. సాధారణంగా ఉదయం 5 గంటల నుంచి 6 గంటల మధ్య నడక ముగిస్తే శరీరానికి తక్కువ ఒత్తిడి పడుతుంది. ఆలస్యంగా నడిస్తే శరీర ఉష్ణోగ్రత పెరిగి వడదెబ్బకు గురయ్యే ప్రమాదం ఉంటుంది.

మొత్తానికి, వాకింగ్ ఆరోగ్యానికి మంచిదే అయినప్పటికీ, అది ఎలా, ఎప్పుడు చేస్తున్నామన్నది కూడా అంతే ముఖ్యం. వ్యక్తిగత ఆరోగ్య పరిస్థితులను దృష్టిలో ఉంచుకుని సరైన నిర్ణయం తీసుకోవడం ద్వారా వేసవిలో కూడా ఫిట్‌గా ఉండవచ్చు.