Milk Jewellery: తల్లిపాలతో జువెలరీ తయారీ.. పెరుగుతున్న డిమాండ్..!

Milk Jewellery: కొందరికి చిన్నతనంలో చేసిన కొన్ని చిలిపి జ్ఞాపకాలను పదిలంగా ఉంచుకోవాలని కోరుకుంటారు. వాటి తాలూకా ఏమైనా ఫొటోలు ఉంటే.. భద్రంగా దాచుకుంటారు. అవి ఎప్పటికీ గుర్తుండి పోవాలి అని.. ఇంట్లోనే ఓ చిన్న పెట్టెలల్లో దాచుకుంటారు. అయితే అమ్మతనం జ్ఞాపకాల్ని ఎప్పటికీ గుర్తుంచుకోవాలి అనుకునే వాళ్లకు.. ఇక్కడ చెప్పే ఈ న్యూస్ ఎంతగానో ఉపయోగపడుతుంది.

తల్లిపాలతో జువెలరీని తయారు చేస్తున్నారు ఇద్దరు ఆర్టిస్టులు. దాని గురించి వివరాల్లోకి వెళ్తే.. చెన్నైకి చెందిన ఆర్టిస్ట్​ ప్రీతి విజయ్​కి చిన్నప్పటి నుంచి ఆర్ట్, క్రాఫ్ట్ వర్క్​ అంటే ఇష్టం. ఆమె డిగ్రీ చదివిన​ తర్వాత పాలిమర్​, మట్టి కలిపి తయారుచేసిన బొమ్మలు అమ్మడం మొదలుపెట్టింది. అయితే ఆమె దగ్గరకు వచ్చిన కొందరు తల్లిపాలతో తయారు చేసిన జువెలరీ కావాలని అడిగేవారట.

దాంతో అప్పటినుంచి ‘మొమ్మాస్​ మిల్కీ లవ్​’ పేరుతో రకరకాల డిజైన్లలో ఉన్న ఉంగరాలు, చెవి కమ్మలు, పెండెంట్స్​ అమ్ముతోంది. అయితే ఆ మెటీరియల్, డిజైన్లను బట్టి ఆమె వాటి ధరను రూ.వెయ్యి నుంచి రూ.4 వేల లోపు ఫిక్స్ చేసింది. ఇలా ఆమె జువెలరీని.. అమెరికాకు చెందిన సారా కాస్టిల్లో ఇన్ స్టాగ్రామ్ లో చూసింది. దీంతో ఆమె కూడా ఆ బిజినెస్ లోకి రావాలనిపించడంతో.. ఆమెను సంప్రదించి వివరాలను కనుక్కోంది.

ధర 60 నుంచి 150 డాలర్లు..

ఎలా తయారు చేస్తారో తెలుసుకొని.. విజయవంతంగా..ఈ ఏడాది మార్చిలో ‘కీప్​సేక్​స్​ బై గ్రేస్​’ అనే కంపెనీ పెట్టింది. ధరను 60 నుంచి 150 డాలర్లకు ఫిక్స్ చేసింది. ఇలా వీళ్లిద్దరూ పాపులర్ అయ్యారు. వీటిని ఎలా తయారు చేస్తారంటే.. తల్లిపాలని ఎండలో ఉంచి.. వాటిని బాగా ఇగుర్చుతారు. దాంతో పాలు పిండిలా మారతాయి. ఆ పిండిలో రెసిన్​ అనే జిగురు పదార్థాన్ని కలిపి.. రాయిగా మారుస్తారు. తర్వాత కస్టమర్లు కోరిన డిజైన్​లో పెండెంట్, రింగ్స్​ తయారుచేసి అందిస్తారు. వీటికి ప్రస్తుతం విపరీతమైన డిమాండ్ ఏర్పడింది.