Karnataka : దారుణం.. మసీదులో ఆరేళ్ల బాలికపై మౌల్వీ తండ్రి అత్యాచారం!

Karnataka : కర్ణాటకలోని చిక్కబళ్లాపురంలో ఒక హృదయ విదారక సంఘటన జరిగింది. మసీదు ఆవరణలో ఆరేళ్ల చిన్నారిపై మౌల్వీ తండ్రి దారుణంగా లైంగిక దాడికి పాల్పడ్డాడు. ఈ విషయం వెలుగులోకి రావడంతో స్థానికులు ఆగ్రహంతో ఊగిపోయారు. నిందితుడిని పట్టుకుని చితకబాది పోలీసులకు అప్పగించారు. ఈ ఘటన స్థానికంగా తీవ్ర కలకలం రేపింది.

పోలీసులు తెలిపిన వివరాల ప్రకారం, నిందితుడు ఒక మసీదులో పనిచేసే మౌల్వీకి తండ్రి. మసీదులో పనిచేసే వ్యక్తి తండ్రి కావడంతో స్థానిక జమాత్ కమిటీ అతడికి మసీదు ఆవరణలోనే నివాసం ఉండేందుకు ఒక గదిని కేటాయించింది. అయితే, ఆ వ్యక్తి వారి నమ్మకాన్ని వమ్ము చేస్తూ దారుణానికి ఒడిగట్టాడు. చాక్లెట్ కొనిస్తానని ఆశ చూపి ఆరేళ్ల బాలికను మసీదులోని తన గదిలోకి తీసుకెళ్లి అత్యాచారానికి పాల్పడినట్టు బాధితురాలి తల్లి పోలీసులకు ఫిర్యాదు చేసింది.

ఈ విషయం తెలిసిన వెంటనే పోలీసులు స్పందించారు. కేసు నమోదు చేసి నిందితుడిని అరెస్ట్ చేసి రిమాండ్‌కు తరలించారు. నిందితుడు సుమారు 20 ఏళ్ల క్రితం ఉత్తరప్రదేశ్ నుంచి చిక్కబళ్లాపురానికి వలస వచ్చి స్థిరపడ్డాడని, ఫుట్‌పాత్‌పై బట్టల వ్యాపారం చేసుకుంటూ జీవనం సాగిస్తున్నాడని పోలీసులు తెలిపారు.

ఈ దారుణ ఘటన వెలుగులోకి రావడంతో స్థానికులు తీవ్ర ఆగ్రహం వ్యక్తం చేశారు. నిందితుడికి మసీదులో ఆశ్రయం కల్పించిన స్థానిక జమాత్ కమిటీపై తీవ్ర విమర్శలు గుప్పించారు. పోలీసులకు అప్పగించే ముందు బాధితురాలి తల్లి, స్థానికులు కలిసి నిందితుడికి దేహశుద్ధి చేశారు. ఈ ఘటన స్థానికంగా తీవ్ర దిగ్భ్రాంతిని కలిగించింది. సమాజంలో ఇలాంటి నేరాలు జరగకుండా కఠిన చర్యలు తీసుకోవాలని ప్రజలు డిమాండ్ చేస్తున్నారు.