ఈ రోజుల్లో ఆరోగ్యంపై శ్రద్ధ పెరుగుతున్న కొద్దీ చాలామంది తమ ఆహారపు అలవాట్లను మార్చుకుంటున్నారు. ముఖ్యంగా బరువు తగ్గాలని భావించే వారు అధిక కేలరీలు ఉన్న జంక్ ఫుడ్ను తగ్గించి, పోషకాలు ఎక్కువగా ఉన్న స్నాక్స్ వైపు మొగ్గు చూపుతున్నారు. ఈ నేపథ్యంలో ఫూల్ మఖానా (మఖానా) మరియు వేయించిన శనగలు మంచి హెల్తీ స్నాక్లుగా ప్రాచుర్యం పొందాయి. అయితే ఈ రెండింటిలో బరువు తగ్గడంలో నిజంగా ఏది ఎక్కువ ప్రయోజనం ఇస్తుందో తెలుసుకోవాలనే ఆసక్తి చాలామందిలో ఉంది.
ఆరోగ్య నిపుణుల అభిప్రాయం ప్రకారం బరువు తగ్గే ప్రక్రియలో తక్కువ కేలరీలు, అధిక ఫైబర్ మరియు సరిపడా ప్రోటీన్ ఉండే ఆహారం కీలక పాత్ర పోషిస్తుంది. ఇలాంటి ఆహారం తీసుకుంటే ఆకలి నియంత్రణలో ఉండటంతో పాటు శరీరానికి అవసరమైన శక్తి కూడా లభిస్తుంది.
మొదట కేలరీల పరంగా చూస్తే మఖానా కాస్త తేలికైన ఆహారంగా పరిగణించబడుతుంది. సుమారు 30 గ్రాముల మఖానాలో 90 నుంచి 110 వరకు కేలరీలు మాత్రమే ఉంటాయి. అదే పరిమాణంలో ఉండే వేయించిన శనగల్లో సుమారు 110 నుంచి 130 కేలరీలు ఉంటాయి. అందువల్ల కేలరీల పరంగా మఖానా కొద్దిగా తక్కువగా ఉంటుంది.
అయితే ప్రోటీన్ విషయానికి వస్తే వేయించిన శనగలు ముందుంటాయి. శనగల్లో ప్రోటీన్ మరియు ఫైబర్ ఎక్కువగా ఉండటంతో ఇవి శరీరానికి శక్తిని అందించడంలో, కండరాల బలాన్ని పెంచడంలో సహాయపడతాయి. అలాగే ఎక్కువసేపు కడుపు నిండిన భావన కలిగిస్తుంది. దీంతో మధ్య మధ్యలో జంక్ ఫుడ్ తినాలనే కోరిక తగ్గుతుంది.
మఖానా మాత్రం తేలికగా అరిగే స్వభావం కలిగి ఉంటుంది. అందువల్ల ఇది తిన్న తర్వాత త్వరగా మళ్లీ ఆకలి వేయొచ్చు. పైగా ఇది లైట్ ఫుడ్ అనే భావనతో కొంతమంది అవసరానికి మించి తినే అవకాశం కూడా ఉంటుంది. అయితే కడుపు బరువుగా అనిపించకుండా తేలికగా ఉండే స్నాక్ కావాలనుకునేవారికి మఖానా మంచి ఎంపికగా చెప్పొచ్చు.
ఆఫీసులో పని చేసే సమయంలో లేదా ప్రయాణాల్లో తేలికపాటి స్నాక్గా మఖానా చాలా మందికి అనుకూలంగా ఉంటుంది. అదేవిధంగా ఇందులో సహజసిద్ధమైన యాంటీఆక్సిడెంట్ గుణాలు కూడా ఉంటాయని నిపుణులు చెబుతున్నారు. ఇవి శరీర ఆరోగ్యాన్ని కాపాడటంలో సహాయపడతాయి.
మరోవైపు ఆకలిని నియంత్రించడం మరియు ఎక్కువసేపు శక్తిని అందించడం వంటి అంశాల్లో వేయించిన శనగలు కొంత మెరుగ్గా ఉంటాయని నిపుణులు సూచిస్తున్నారు. బరువు తగ్గే ప్రయత్నంలో ఉన్నవారు వీటిని తమ ఆహారంలో చేర్చుకోవచ్చు.
అయితే ఏది తిన్నా పరిమితి చాలా ముఖ్యం. రోజుకు సుమారు 25 నుంచి 30 గ్రాముల వరకు మాత్రమే తీసుకోవడం మంచిదని నిపుణులు సూచిస్తున్నారు. ముఖ్యంగా వీటిని నూనె లేదా నెయ్యిలో వేయించి మసాలాలు వేసి తింటే కేలరీలు పెరిగే అవకాశం ఉంటుంది. అలా చేస్తే ఆరోగ్య ప్రయోజనాలు కూడా తగ్గిపోవచ్చు.
అందువల్ల మఖానా గానీ, వేయించిన శనగలు గానీ డ్రై రోస్ట్ చేసిన రూపంలోనే తీసుకుంటే మంచి ఫలితం ఉంటుంది. సరైన పరిమాణంలో తీసుకుంటే ఈ రెండు స్నాక్లు కూడా ఆరోగ్యానికి మేలు చేస్తాయని నిపుణులు చెబుతున్నారు.
