మాస్ హీరో ఇమేజ్‌ను పక్కన పెట్టి ప్రభాస్ చేసిన ప్రయోగం.. ఫలితం ఏంటంటే?

పాన్ ఇండియా స్టార్ ప్రభాస్ ప్రస్తుతం వరుస భారీ ప్రాజెక్టులతో బిజీగా ఉన్నాడు. ఇటీవల విడుదలైన ‘ది రాజాసాబ్’ తర్వాత ఇప్పుడు సందీప్ రెడ్డి వంగా దర్శకత్వంలో తెరకెక్కుతున్న ‘స్పిరిట్’ సినిమాపై భారీ అంచనాలు నెలకొన్నాయి. అదే సమయంలో ‘సలార్ 2’, ‘కల్కి 2’, అలాగే హను రాఘవపూడి తెరకెక్కిస్తున్న ‘ఫౌజీ’ చిత్రాలు కూడా ప్రభాస్ లైనప్‌లో ఉన్నాయి. ప్రస్తుతం దేశవ్యాప్తంగా అత్యంత బిజీగా ఉన్న హీరోల్లో ప్రభాస్ ముందువరుసలో ఉన్నాడు.

అయితే కెరీర్‌లో ఎన్నో బ్లాక్‌బస్టర్లు అందుకున్న ప్రభాస్‌కు కొన్ని చేదు అనుభవాలు కూడా ఉన్నాయి. అందులో ప్రత్యేకంగా చెప్పుకునే సినిమా ‘చక్రం’. దర్శకుడు కృష్ణవంశీ తెరకెక్కించిన ఈ చిత్రం విడుదల సమయంలో పెద్దగా ప్రేక్షకాదరణ పొందకపోయినా, తర్వాత మాత్రం ఒక డిఫరెంట్ ఎమోషనల్ డ్రామాగా గుర్తింపు తెచ్చుకుంది.

సినీ వర్గాల్లో అప్పట్లో వినిపించిన సమాచారం ప్రకారం, ‘చక్రం’ కథను మొదటగా చిరంజీవికు వినిపించారట. అయితే కథలో కమర్షియల్ ఎలిమెంట్స్ తక్కువగా ఉండటం, క్లైమాక్స్ పూర్తిగా భావోద్వేగంగా ముగియడం వల్ల ఆయన ఆసక్తి చూపలేదని టాక్. ఆ తర్వాత ఈ కథ మహేష్ బాబు దగ్గరకు వెళ్లిందని, ఆయన కూడా అదే కారణంతో ప్రాజెక్ట్‌కు దూరంగా ఉన్నారని సినీ వర్గాల్లో అప్పట్లో ప్రచారం జరిగింది.

చివరకు ఈ కథను విన్న ప్రభాస్ మాత్రం కొత్త తరహా కథగా భావించి వెంటనే ఓకే చెప్పాడట. యాక్షన్, మాస్ ఇమేజ్‌కు భిన్నంగా పూర్తిగా భావోద్వేగాలతో నిండిన పాత్రలో నటించేందుకు సాహసం చేశాడు. సినిమాలో ప్రభాస్ నటనకు మంచి ప్రశంసలు వచ్చినప్పటికీ, ప్రేక్షకులు మాత్రం ఆ సమయంలో అలాంటి కథను పెద్దగా ఆదరించలేదు. ముఖ్యంగా హీరో పాత్ర విషాదాంతంగా ముగియడం అభిమానులను నిరాశపరిచిందని అప్పట్లో విశ్లేషణలు వచ్చాయి.

బాక్సాఫీస్ వద్ద ‘చక్రం’ ఆశించిన ఫలితం అందుకోలేకపోయినా, కాలక్రమేణా ఈ సినిమాకు ప్రత్యేకమైన అభిమాన వర్గం ఏర్పడింది. సినిమాలోని భావోద్వేగ సన్నివేశాలు, కుటుంబ సంబంధాలపై చూపించిన తీరుకు ఇప్పటికీ చాలామంది ప్రశంసలు కురిపిస్తుంటారు. ముఖ్యంగా “జగమంత కుటుంబం నాది” పాట ఇప్పటికీ సంగీత ప్రియులను అలరిస్తూనే ఉంది.

ఈ చిత్రంలో ఆసిన్, చార్మి కౌర్, ప్రకాశ్ రాజ్ కీలక పాత్రల్లో నటించారు. కమర్షియల్‌గా విఫలమైనా, నటుడిగా ప్రభాస్‌లోని మరో కోణాన్ని ప్రేక్షకులకు పరిచయం చేసిన సినిమాగా ‘చక్రం’ ఇప్పటికీ గుర్తుండిపోయింది.