నాకు అవకాశాలు రాకపోవడానికి కారణం అదే.. సింగర్ మనో

ఎస్పీ బాలసుబ్రమణ్యం తర్వాత మళ్లీ అటువంటి వాయిస్ అని అందరూ బాగా మెచ్చుకున్న సీనియర్ సింగర్ మనో( నాగూర్ బాబు). సింగర్ గా మనో మొత్తం 13 భాష‌ల్లో 25 వేల పాట‌లు పాడారు. ఇవి కాకుండా కొన్ని ప్రైవేట్ ఆల్బ‌మ్స్‌లో మ‌రో 25 వేల పాట‌లు పాడారు. సింగర్ గానే కాకుండా డబ్బింగ్ ఆర్టిస్ట్‌గా మనోకి మంచి పేరుంది. గతకొంత కాలంగా సూపర్ స్టార్ రజనీకాంత్‌కి మనో డబ్బింగ్ చెబుతున్నారు. మనో (నాగూర్ బాబు) సత్తెనపల్లి లోని ఓ ముస్లిం కుటుంబంలో జన్మించాడు. ఆయన తల్లి షహీదా, తండ్రి రసూల్. మనో నేదునూరి కృష్ణమూర్తి దగ్గర కర్ణాటక సంగీతం నేర్చుకున్నారు.

గాయకుడిగా పరిచయమవక ముందే ‘నీడ’ అనే సినిమాలో బాలనటుడిగా నటించారు. మ్యూజిక్ మాస్ట్రో ఇళయరాజా నాగూర్ బాబు పేరును మనోగా మార్చాడు. మనో అన్నయ్య తబలా వాయించేవారు. తనని సంగీత దర్శకులు చక్రవర్తి దగ్గర చేరుద్దామని చెన్నై తీసుకెళ్ళారు. మనో – మనో వాళ్ళ అన్నయ్య ప్రతిభను గుర్తించిన చక్రవర్తి ఇద్దరినీ అక్కడే సహాయకుడిగా ఉండిపొమ్మన్నాడు. అలా నేపథ్య గానంలో మెళకువలు తెలుసుకున్నారు. చాలాకాలం తెలుగులో నాగూర్‌బాబుగా, తమిళంలో మనోగా పాటలు పాడారు. సింగర్ గా మనో పాడిన మొదటి పాట మురళీ మోహన్, జయభేరి పతాకం మీద తీసిన కర్పూరదీపం అనే సినిమాలో.

సింగర్ గా మనో చాలా వైవిధ్యమైన గాత్రంతో పాటలు పాడగలరు. అందుకు ఉదాహరణ ప్రేమికుడు సినిమాలోని ముక్కాలా ముక్కాబులానే. ఈ పాట కోసం మనో రాత్రంతా రక రకాల వాయిస్‌లు ట్రై చేసి ఫైనల్‌గా ఆర్‌డి.బర్మన్ పాట విని ఆ స్టైల్లో పాడి సంగీత దర్శకుడు ఏ ఆర్ రెహమాన్ ని మెప్పించారు. హరిశ్చంద్ర పద్యాలు మనో చాలా అద్భుతంగా పాడతారు. మనోని బాలుతో పాటు చాలామంది హరిశ్చంద్ర పద్యాలు ఎంతో ఇష్టంగా పాడించుకుంటారు. అయితే గత కొంతకాలంగా మనోకి సినిమాలలో పాటలు పాడే అవకాశం దక్కడం లేదు.

అందుకు కారణం కొత్త కొత్త సింగర్స్ రావడమే. అందుకే ఆయనకి అవకాశాలు తగ్గాయి. ఇది ఆయన మాత్రమే పాడాలి అనుకునే మ్యూజిక్ డైరెక్టర్ తప్ప మిగతావాళ్ళు మనోతో పాడించడం లేదు. అయితే బుల్లితెర మీద మాత్రం పలు షోస్ తో బిజీగా ఉంటున్నారు. చాలాకాలం తర్వాత మనో మళ్లీ నటుడిగా కనిపించబోతున్నారు. మనోకి స్క్రీన్ మీద కనిపించడం చాలా ఇష్టం. కానీ సింగర్ గా ఉన్నప్పుడు ఇలా నటించే అవకాశం రాలేదు. ఇప్పుడు క్రేజీ అంకుల్స్ అనే సినిమాలో ఓ కీలక పాత్ర పోషిస్తున్నారు. బుల్లితెర యాంకర్, క్యారెక్టర్ ఆర్టిస్ట్ శ్రీముఖి ఇందులో లీడ్ రోల్ చేస్తోంది. ఈ పాత్ర మెచ్చితే మనో మరిన్ని పాత్రలు చేయడానికి రెడీ అంటున్నారు.