“కెప్టెన్ నిర్ణయాల్లో కూడా వేలుపెడుతున్నాడు..” గంభీర్ పై సంచలన వ్యాఖ్యలు చేసిన సునీల్ గవాస్కర్.!

గంభీర్‌పై నెటిజన్లు, క్రికెట్ అభిమానులు తీవ్రస్థాయిలో విమర్శలు గుప్పిస్తున్నారు. ముఖ్యంగా విరాట్ కోహ్లీ, రోహిత్ శర్మలు తమ కెరీర్‌ను ముందుగా ముగించడానికి గంభీర్ కారణమని ఆరోపణలు చేశారు. ఇద్దరూ ఇంకా ఆడగలిగే స్థితిలో ఉన్నప్పటికీ గంభీర్ ఒత్తిడి వల్లే టెస్ట్ క్రికెట్‌కు గుడ్‌బై చెప్పారని పలు కామెంట్లు చేస్తున్నారు. ఇదే కాకుండా గంభీర్ తన స్నేహితులను జట్టులోకి తీసుకుంటున్నాడని ఆరోపణలు వెల్లువెత్తుతున్నాయి. నాలుగో టెస్ట్‌లో సీనియర్ స్పిన్నర్ కుల్‌దీప్ యాదవ్‌ను పక్కనబెట్టి యువ ఆటగాడు కంబోజ్‌కు అవకాశం ఇవ్వడాన్ని కూడా నెటిజన్లు తప్పుపడుతున్నారు. అలాగే సర్ఫరాజ్ ఖాన్, శ్రేయస్ అయ్యర్‌లకు అవకాశమే ఇవ్వకపోవడం, షమీని పక్కన పెట్టడం వంటి నిర్ణయాలపై తీవ్ర అసంతృప్తి వ్యక్తమవుతోంది.

సునీల్ గవాస్కర్ తీవ్ర వ్యాఖ్యలు

ఈ వివాదంపై లెజెండరీ క్రికెటర్ సునీల్ గవాస్కర్ తీవ్ర వ్యాఖ్యలు చేశారు. సోనీ స్పోర్ట్స్‌తో మాట్లాడిన గవాస్కర్ మాట్లాడుతూ.. తుది జట్టుపై నిర్ణయం తీసుకోవాల్సింది కెప్టెన్‌నేనని, శుభ్‌మాన్ గిల్ తన అభిప్రాయాన్ని స్పష్టంగా వెల్లడించి ఉండొచ్చని చెప్పారు. “గిల్, శార్దూల్ కంటే కుల్దీప్‌ను తుది జట్టులోకి తీసుకోవాలని అనుకున్నాడు. కానీ, అతడి అభిప్రాయాన్ని పట్టించుకోకుండా కోచ్ నిర్ణయం తీసుకున్నట్లుగా కనిపిస్తోంది” అని గవాస్కర్ పరోక్షంగా ఆరోపించారు.

కెప్టెన్‌దే తుది నిర్ణయం కావాలని, జట్టు ఫలితంపై బాధ్యత కూడా అతడికే ఉంటుందని గవాస్కర్ గుర్తుచేశారు. “గతంలో కోచ్‌ల పాత్ర పరిమితంగా ఉండేది. వారు ఎక్కువగా మేనేజ్మెంట్ పరంగా ఉండేవారు. ఆట ముగిసిన తర్వాత సలహాలు ఇచ్చేవారు. కానీ ఇప్పుడు పరిస్థితి పూర్తిగా మారిపోయింది,” అని ఆయన వ్యాఖ్యానించారు.

ఈ సందర్భంలో గంభీర్‌పై ఆయన తీవ్ర విమర్శలు చేశారు. గంభీర్ టీమిండియాలోకి తనకు కావాల్సినంత బలాన్ని తెచ్చుకున్నాడని, తనకు కావలసిన వారు, స్టాఫ్‌ మొత్తం కేకేఆర్ నుంచి తీసుకువచ్చాడని చెప్పారు. రోహిత్ శర్మ, విరాట్ కోహ్లీ రిటైర్మెంట్ నిర్ణయాల్లో కూడా గంభీర్ పాత్ర ఉందనే వార్తలు వినిపిస్తున్నాయని గవాస్కర్ పేర్కొన్నారు.

“ఇంగ్లండ్ పర్యటనలో భారత జట్టు చూపిన పేలవ ప్రదర్శనకు పూర్తి క్రెడిట్ గంభీర్‌కే ఇవ్వాలి. ఆయన స్వయంగా తుది జట్టుపై, కెప్టెన్‌పై ప్రభావం చూపిస్తున్నట్లుగా కనిపిస్తోంది. ఇది భారత క్రికెట్‌కు మేలు చేయదు. కెప్టెన్ కంటే కోచ్‌కి ఎక్కువ పవర్ ఉండాలని చూస్తే అది జట్టు పరిపక్వతను దెబ్బతీస్తుంది,” అని గవాస్కర్ తీవ్ర వ్యాఖ్యలు చేశారు.

జట్టు ప్రయోజనాలపై చర్చ

ఈ వ్యాఖ్యలతో క్రికెట్ వర్గాల్లో గంభీర్ పాత్రపై ప్రశ్నలు మొదలయ్యాయి. నిజంగానే గంభీర్ ఎక్కువ పవర్‌తో వ్యవహరిస్తున్నాడా? టీమిండియా తుది జట్టును కోచ్ డిక్టేట్ చేస్తున్నాడా? అన్న అనుమానాలు అభిమానుల్లో గుబులు రేపుతున్నాయి. వాస్తవానికి కుల్దీప్ యాదవ్‌ను పక్కన పెట్టిన కారణాలు స్పష్టంగా బయట పడకపోయినా, ఈ నిర్ణయానికి ఉన్న లోతైన కారణాలపై త్వరలోనే బీసీసీఐ క్లారిటీ ఇవ్వాల్సిన అవసరం ఉంది.