“దయచేసి ఇక ఆపేయండి..” తమ కూతురిపై వస్తున్న వార్తలపై దిశ కుటుంబం ఆవేదన.

బాలీవుడ్ నటుడు దివంగత సుశాంత్ సింగ్ రాజ్ పుత్ మరియు అయన మాజీ మేనేజర్ దిశా ల మరణంపై నేటికీ అనేక రకాల వార్తలు వస్తూనే ఉన్నాయి. గత నెల 8 వ తారీఖున ముంబై లోని తన అపార్ట్మెంట్ 14 వ అంతస్తు నుంచి దూకి బలవాన్మరణానికి పాల్పడింది దిశ. అయితే అప్పటి నుంచి నేటి వరకు అనే వదంతులు, ఊహాగానాలు వస్తూనే ఉన్నాయి. అయితే ఆ వార్తలపై దిశ కుటుంబ సభ్యులు అభ్యంతరం వ్యక్తం చేసారు. ఇకపై అటువంటి వార్తలను నిలిపివేయాలని ఆమె కుటుంబం కోరుతున్నారు. ఈ మేరకు ఒక ప్రకటన విడుదల చేసారు దిశ కుటుంబ సభ్యులు.

అసలే తమకుటుంబ సభ్యురాలి మృతితో తాము తీవ్ర ఆవేదనలో ఉన్నామని, దానికి తోడు ఇటువంటి వార్తలను చూసి మరింత బాధ పడుతున్నామని ఆమె కుటుంబ సభ్యులు పేర్కొన్నారు. దిశా మరణం తమకు తీవ్రమైన దుఃఖాన్ని మిగిల్చిందని, ఇప్పుడిప్పుడే ఆ బాధ నుంచి బయటపడుతున్న తమకు ఈ వార్తలు మరింతగా కృంగదీస్తున్నాయని ఆ ప్రకటనలో తెలిపారు. ముఖ్యంగా దిశా తల్లిదండ్రులు తీవ్ర ఆవేదనలో ఉన్నారని, దయచేసి ఇటువంటి ఊహాగానాలకు, ఫేక్ వార్తలకు ఇంతటితో ఆపివేయాలని తమ స్టేట్ మెంట్ లో పేర్కొన్నారు.