వైసీపీ అబద్ధాలకు బ్రాండ్ అంబాసిడర్.. మంత్రి నిమ్మల రామానాయుడు!

అమరావతి: వై.ఎస్.ఆర్. కాంగ్రెస్ పార్టీ (వైసీపీ) అబద్ధాలు, అసత్యాలకు బ్రాండ్ అంబాసిడర్‌గా మారిందని మంత్రి నిమ్మల రామానాయుడు తీవ్ర స్థాయిలో విమర్శించారు. వైసీపీ సృష్టించిన భూతం చివరికి వారినే మింగేస్తుందని, సీసాలో బిరడా బిగించి మూతపెట్టినట్టే వారి పరిస్థితి ఉంటుందని ఎద్దేవా చేశారు.

జగన్ పై విమర్శలు..

వైఎస్ జగన్ మోహన్ రెడ్డి గంభీరమైన మాటలు మాత్రమే చెబుతారని, వాటిని చేతల్లో చూపించరని మంత్రి వ్యాఖ్యానించారు. రాబోయే అసెంబ్లీ సమావేశాలకు ఆయన హాజరవుతారన్న నమ్మకం తమకు లేదని నిమ్మల పేర్కొన్నారు.

స్టీల్ ప్లాంట్ పై వివరణ..

విశాఖపట్నం స్టీల్ ప్లాంట్ అంశంపై మంత్రి నిమ్మల మాట్లాడుతూ, అధికారంలో ఉన్నప్పుడు ప్రైవేటీకరణకు ప్రయత్నించి, ప్రతిపక్షంలో ఉన్నప్పుడు మొసలి కన్నీరు కార్చడం వైసీపీకి అలవాటని దుయ్యబట్టారు. గతంలో అప్పటి ప్రధాని అటల్ బిహారీ వాజపేయి హయాంలో చంద్రబాబు ప్రత్యేక ప్యాకేజీ తీసుకువచ్చి స్టీల్ ప్లాంట్ ప్రైవేటీకరణను అడ్డుకున్నారని గుర్తు చేశారు. అయితే, వైసీపీ పాలనలో ప్రైవేటీకరణ ప్రయత్నాలు జరిగినప్పుడు వారి ఎంపీలు, నాయకులు నోరు మెదపలేదని ఆరోపించారు. కూటమి ప్రభుత్వం అధికారంలోకి వచ్చిన తర్వాత, చంద్రబాబు రూ.11 వేల కోట్ల నిధులను తెచ్చి స్టీల్ ప్లాంట్‌ను కాపాడారని నిమ్మల స్పష్టం చేశారు.

వైసీపీ హయాంలో విద్యా రంగం నాశనం: మంత్రి నిమ్మల

అమరావతి: వైసీపీ ఐదేళ్ల పాలనలో ఒక్క టీచర్ పోస్టు కూడా భర్తీ చేయలేదని, విద్యా రంగాన్ని పూర్తిగా నాశనం చేశారని మంత్రి నిమ్మల రామానాయుడు ఆరోపించారు. అడ్డగోలు సిఫార్సులు, బదిలీల పేరుతో దాదాపు రూ.50 కోట్లు వసూలు చేశారని మండిపడ్డారు.

టీచర్ల పట్ల నిర్లక్ష్యం..

టీచర్లను ఎన్నికల విధులకు దూరంగా ఉంచేందుకు ప్రయత్నించారని, గురువులను గౌరవించాల్సిన బదులు వారిని వైన్ షాపుల వద్ద కాపలా పెట్టారని నిమ్మల విమర్శించారు. మరుగుదొడ్లను కడిగించారంటూ తీవ్రంగా ఖండించారు.

మెగా డీఎస్సీ ప్రకటన..

డీఎస్సీ అంటే చంద్రబాబు, చంద్రబాబు అంటేనే డీఎస్సీ అని నిమ్మల అన్నారు. దేశంలో రికార్డు స్థాయిలో రెండు లక్షల టీచర్ పోస్టులను భర్తీ చేసిన ఘనత చంద్రబాబుకే దక్కుతుందని తెలిపారు. ఎన్నికల్లో యువతకు ఇచ్చిన హామీ మేరకు కూటమి ప్రభుత్వం మెగా డీఎస్సీ ద్వారా 16,347 పోస్టులను భర్తీ చేస్తోందని చెప్పారు.

ప్రభుత్వ విద్యకు ప్రాధాన్యత..

ప్రైవేట్ పాఠశాలలకు ధీటుగా ప్రభుత్వ పాఠశాలల్లో విద్యార్థులకు నాణ్యమైన షూలు, యూనిఫారాలు, బ్యాగులు అందిస్తున్నామని మంత్రి పేర్కొన్నారు. మధ్యాహ్న భోజనంలో సన్నరకం బియ్యం అందించడంతో పాటు, విద్యా ప్రమాణాలను పెంచేందుకు తమ ప్రభుత్వం కృషి చేస్తోందని నిమ్మల రామానాయుడు స్పష్టం చేశారు.