వ్యాక్సిన్ కూడా లేదు.. ప్రపంచ దేశాలను కలవరపెడుతున్న ఆండీస్ వైరస్!

దక్షిణ అట్లాంటిక్ సముద్రంలో ప్రయాణిస్తున్న ఒక లగ్జరీ క్రూజ్ నౌకలో అరుదైన వైరస్ కేసులు వెలుగుచూడటంతో అంతర్జాతీయ స్థాయిలో ఆందోళన వ్యక్తమవుతోంది. ఆర్జెంటీనాలోని ఉషువాయా నుంచి అంటార్కిటికా వైపు బయలుదేరిన MV Hondius నౌకలో ప్రయాణికులు, సిబ్బంది కలిపి సుమారు 150 మంది ఉన్నట్లు సమాచారం. ప్రయాణం సాధారణంగానే కొనసాగుతున్న సమయంలో కొందరికి తీవ్రమైన జ్వరం, శ్వాస తీసుకోవడంలో ఇబ్బందులు, అలసట వంటి లక్షణాలు కనిపించడంతో వైద్య బృందాలు అప్రమత్తమయ్యాయి.

కొద్ది రోజుల్లోనే మరికొంతమందికి కూడా అదే లక్షణాలు కనిపించడంతో పరిస్థితి మరింత ఆందోళనకరంగా మారింది. ప్రారంభంలో దీనిని సాధారణ వైరల్ ఇన్ఫెక్షన్‌గా భావించినప్పటికీ, పరీక్షల అనంతరం ఇది హంటావైరస్ పల్మనరీ సిండ్రోమ్‌కు సంబంధించిన ఆండీస్ వైరస్ స్ట్రెయిన్‌గా గుర్తించినట్లు అంతర్జాతీయ మీడియా వెల్లడించింది. ఈ వైరస్ ప్రధానంగా ఎలుకల ద్వారా వ్యాపిస్తుందని, అరుదుగా మనుషుల మధ్య కూడా సంక్రమించే అవకాశం ఉంటుందని నిపుణులు చెబుతున్నారు.

వైరస్ నిర్ధారణ అనంతరం నౌకను కేప్ వెర్డ్ సమీపంలో నిలిపివేసి క్వారంటైన్‌లో ఉంచినట్లు సమాచారం. ప్రయాణికులను ప్రత్యేక గదుల్లో ఐసోలేట్ చేసి వైద్య పర్యవేక్షణలో ఉంచుతున్నారు. సిబ్బంది ప్రత్యేక రక్షణ దుస్తులు ధరించి సేవలు అందిస్తున్నారు. ఇదిలా ఉండగా, కొంతమంది ప్రయాణికులు మధ్యలోనే ఇతర దేశాలకు వెళ్లినట్లు సమాచారం రావడంతో పలు దేశాలు అప్రమత్తమయ్యాయి.

ప్రపంచ ఆరోగ్య సంస్థ (WHO) పరిస్థితిని నిశితంగా పరిశీలిస్తున్నట్లు తెలుస్తోంది. వైరస్ వ్యాప్తి చెందకుండా కాంటాక్ట్ ట్రేసింగ్, ఆరోగ్య పరీక్షలు వేగవంతం చేసినట్లు అధికారులు వెల్లడించారు. ప్రస్తుతం ఈ వైరస్‌కు ప్రత్యేక వ్యాక్సిన్ లేదా నిర్దిష్ట చికిత్స అందుబాటులో లేకపోవడం ఆందోళన పెంచుతోంది.

నిపుణుల ప్రకారం ఈ వైరస్ సోకినవారిలో మొదట జ్వరం, కండరాల నొప్పులు, అలసట, తలనొప్పి వంటి లక్షణాలు కనిపించవచ్చు. ఆ తర్వాత శ్వాస సంబంధిత సమస్యలు తీవ్రరూపం దాల్చే అవకాశం ఉందని హెచ్చరిస్తున్నారు. ఆరోగ్య సమస్యలు కనిపించిన వెంటనే వైద్యులను సంప్రదించాలని సూచిస్తున్నారు.