Villas in Dubai : దుబాయ్ లో ఖరీదైన విల్లాలు కలిగిన బాలీవుడ్ స్టార్లు వీరే!

Villas in Dubai : దుబాయ్ అంటేనే విలాసానికి, అత్యాధునిక జీవనానికి చిరునామా. ఈ నగరం ప్రపంచ పర్యాటకులను ఆకర్షించడమే కాకుండా, మన బాలీవుడ్ తారలకు కూడా ఒక ఇష్టమైన నివాస స్థలంగా మారిపోయింది. చాలా మంది బాలీవుడ్ సెలబ్రిటీలు ఇక్కడ ఖరీదైన ఇళ్లను కొనుగోలు చేసి తమ స్టేటస్‌ను చాటుకుంటున్నారు. దుబాయ్ ఆకాశహర్మ్యాలు, అద్భుతమైన సముద్రతీరాలు, విలాసవంతమైన జీవనశైలి వారిని విశేషంగా ఆకర్షిస్తున్నాయి. మరి దుబాయ్‌లో సొంత ఇళ్లు కలిగి ఉన్న ఆ లక్కీ బాలీవుడ్ తారలు ఎవరో చూద్దామా! .

షారుఖ్ ఖాన్: ప్యాలెస్ లాంటి విల్లా

బాలీవుడ్ బాద్‌షా షారుఖ్ ఖాన్‌కు దుబాయ్ అంటే చెప్పలేనంత ఇష్టం. ఆయనకు పామ్ జుమేరాలో ఒక విలాసవంతమైన విల్లా ఉంది, దీని విలువ దాదాపు రూ.100 కోట్లు ఉంటుందట. ఈ విల్లాను దుబాయ్‌లోని ప్రముఖ రియల్ ఎస్టేట్ సంస్థ నఖీల్ ఆయనకు బహుమతిగా ఇచ్చింది. దీనికి ‘మన్నత్’ అని పేరు కూడా పెట్టారు. ప్రైవేట్ బీచ్, అత్యాధునిక హంగులతో ఈ విల్లా షారుఖ్ స్థాయికి తగ్గట్టుగా ఉంటుంది. ఇక్కడ షారుఖ్ తన కుటుంబంతో కలిసి ఎన్నో సంతోషకరమైన క్షణాలు గడుపుతారు. నిజంగా ఇది కలలో కూడా ఊహించలేని ఇల్లు కదూ!

శిల్పా శెట్టి: బుర్జ్ ఖలీఫా దగ్గర ఇల్లు

90వ దశకంలో తన అందం, అభినయంతో ప్రేక్షకులను మెప్పించిన శిల్పా శెట్టికి 2010లో ఆమె భర్త రాజ్ కుంద్రా ఒక ఖరీదైన గిఫ్ట్ ఇచ్చారు. అదేమిటంటే.. ప్రపంచంలోనే ఎత్తైన భవనం బుర్జ్ ఖలీఫా దగ్గర దాదాపు రూ.50 కోట్ల విలువైన ఒక అపార్ట్‌మెంట్. అయితే, ఆ తర్వాత ఈ జంట ఆ అపార్ట్‌మెంట్‌ను అమ్మేసి, దుబాయ్‌లోని పామ్ జుమేరా వద్ద ఒక విలాసవంతమైన విల్లాను కొనుగోలు చేశారట. అంటే ఇప్పుడు శిల్పా శెట్టి కూడా షారుఖ్ ఖాన్‌కు పొరుగున ఉంటున్నారన్నమాట!

సల్మాన్ ఖాన్: డౌన్‌టౌన్‌లో అపార్ట్‌మెంట్

బాలీవుడ్ కండల వీరుడు సల్మాన్ ఖాన్‌కు విహార ప్రదేశాల్లో ఇళ్లు కొనుగోలు చేయడం కొత్తేమీ కాదు. దుబాయ్‌లోని బుర్జ్ ఖలీఫా దగ్గర ఉన్న ‘ది అడ్రస్ డౌన్‌టౌన్’లో ఆయనకు ఒక అందమైన అపార్ట్‌మెంట్ ఉంది. ఇక్కడి నుంచి చూస్తే ఫౌంటెయిన్లు, రాత్రివేళ మెరిసిపోయే ఆకాశహర్మ్యాల సుందర దృశ్యాలు కనువిందు చేస్తాయి. సల్మాన్ ఖాన్ తన బిజీ షెడ్యూల్ నుంచి కాస్త విరామం దొరికినప్పుడల్లా ఇక్కడ రిలాక్స్ అవుతారు.

అభిషేక్ బచ్చన్, ఐశ్వర్య రాయ్ బచ్చన్: జుమేరా గోల్ఫ్ ఎస్టేట్స్‌లో విల్లా

బాలీవుడ్ మోస్ట్ లవ్లీ కపుల్ అభిషేక్ బచ్చన్, ఐశ్వర్య రాయ్ బచ్చన్ కూడా దుబాయ్‌లో పెట్టుబడులు పెట్టారు. జుమేరా గోల్ఫ్ ఎస్టేట్స్‌లోని సాంక్చూరీ ఫాల్స్‌లో వీరు రూ.16 కోట్ల విలువైన ఒక విలాసవంతమైన విల్లాను కొనుగోలు చేశారు. ఈ విల్లాలో ప్రైవేట్ స్విమ్మింగ్ పూల్, అందమైన గార్డెన్, గోల్ఫ్ కోర్స్ వంటి సౌకర్యాలు ఉన్నాయి. వీలు కుదిరినప్పుడల్లా బచ్చన్ ఫ్యామిలీ ఇక్కడ హాలిడేస్ గడుపుతుంది.

అనిల్ కపూర్: అల్ ఫుర్జాన్‌లో అపార్ట్‌మెంట్

ఎప్పటికీ యంగ్‌గా కనిపించే అనిల్ కపూర్ కూడా దుబాయ్‌లో ఒక ఇల్లు కొన్నారు. ఆయనకు దుబాయ్‌లోని అల్ ఫుర్జాన్‌లో రెండు బెడ్‌రూమ్‌ల అపార్ట్‌మెంట్ ఉంది. ఈ ప్రాంతం మంచి మౌలిక సదుపాయాలు, ప్రణాళికాబద్ధమైన ల్యాండ్‌స్కేప్స్, సులువుగా ఎక్కడికైనా వెళ్లడానికి వీలుగా ఉండటంతో చాలామందికి ఫేవరెట్ స్పాట్‌గా మారింది.

మలైకా అరోరా: వెర్సాచె డిజైన్ విల్లా

ఫిట్‌నెస్‌కు, స్టైల్‌కు మారుపేరుగా నిలిచే మలైకా అరోరాకు పలాజో వెర్సాసె దుబాయ్‌లో ఒక విలాసవంతమైన కాటేజ్ విల్లా ఉంది. ఈ విల్లాను పూర్తిగా వెర్సాచె ఫర్నీచర్‌తో అలంకరించారు. మలైకా తన టేస్ట్‌కి తగ్గట్టుగా ఈ ఇంటిని ఎంతో అందంగా తీర్చిదిద్దుకున్నారు.

ఇలా దుబాయ్ నగరం బాలీవుడ్ తారలకు ఒక విలాసవంతమైన నివాసంగా మారిపోయింది. వీళ్లంతా తమ బిజీ లైఫ్ నుంచి కాస్త రిలాక్స్ అవ్వడానికి దుబాయ్‌లోని ఈ ఇళ్లకు వస్తుంటారు.