Padmavathi Express : పద్మావతి ఎక్స్‌ప్రెస్‌లో దొంగల బీభత్సం.. మూడు బోగీల్లో చోరీ!

పద్మావతి ఎక్స్‌ప్రెస్‌లో దొంగలు బీభత్సం సృష్టించారు. సికింద్రాబాద్‌ నుంచి తిరుపతికి వెళ్తున్న ఈ రైల్లో దుండగులు మూడు బోగీల్లో చోరీలకు పాల్పడ్డారు. ప్రయాణంలో ఉన్న ముగ్గురు మహిళల వద్ద ఉన్న సుమారు 40 గ్రాముల బంగారు ఆభరణాలను అపహరించారు. అలాగే దాదాపు రూ. 2 వేల నగదు, ఒక మొబైల్ ఫోన్ కూడా దొంగతనానికి గురైనట్లు సమాచారం. ఈ ఘటన కావలి మరియు శ్రీ వెంకటేశ్వర పాలెం రైల్వే స్టేషన్ల మధ్య చోటు చేసుకుంది.

ప్రయాణికులు నిద్రలో ఉండగా దుండగులు బోగీల్లోకి చొరబడి విలువైన వస్తువులను అపహరించారని భావిస్తున్నారు. బాధితులు ఉదయం గమనించి రైల్వే అధికారులకు ఫిర్యాదు చేశారు. సమాచారం అందుకున్న వెంటనే రైల్వే పోలీసులు సంఘటన స్థలానికి చేరుకుని కేసు నమోదు చేసి దర్యాప్తు ప్రారంభించారు. ఈ దొంగతనంతో రైళ్లలో ప్రయాణించేవారిలో ఆందోళన నెలకొనింది. రైళ్లలో భద్రతపై మళ్ళీ ప్రశ్నలు రేకెత్తుతున్నాయి.