గంటల తరబడి హీల్స్ వేస్తున్నారా?స్టైల్ కోసం ఆరోగ్యం పణంగా పెట్టొద్దు!

నేటి జీవనశైలిలో హైహీల్స్ మహిళల ఫ్యాషన్‌లో విడదీయరాని భాగంగా మారాయి. ఆఫీసు నుంచి వేడుకల వరకు స్టైలిష్‌గా కనిపించేందుకు చాలా మంది వీటిని ఎక్కువసేపు ధరిస్తున్నారు. అయితే, దీర్ఘకాలం హీల్స్ వాడకం శరీరంపై ప్రతికూల ప్రభావం చూపుతుందని వైద్య నిపుణులు చెబుతున్నారు. ముఖ్యంగా పాదాలపై బరువు సమానంగా పంచుకోకుండా వేళ్లవైపు కేంద్రీకృతం కావడం వల్ల మోకాళ్లపై ఒత్తిడి పెరుగుతుందని వివరించారు.

ఈ అదనపు ఒత్తిడి కారణంగా మోకాళ్ల కీళ్లలో నొప్పులు త్వరగా మొదలయ్యే అవకాశం ఉంది. దీర్ఘకాలంలో కీళ్ల సమస్యలు, ముఖ్యంగా ఆర్థరైటిస్ వంటి సమస్యలు వచ్చే ప్రమాదం ఉందని వైద్యులు హెచ్చరిస్తున్నారు. హీల్స్ ధరించినప్పుడు శరీర నిలువు భంగిమ మారిపోవడం వల్ల వెన్నెముకపై ఒత్తిడి పెరిగి నడుము, మెడ నొప్పులు కూడా ఎదురయ్యే అవకాశముంది.

ఇక పాదాల వెనుక భాగంలో ఉండే టెండన్లు బిగుసుకుపోవడం వల్ల, చెప్పులు తీసేసిన తర్వాత కూడా అసౌకర్యం కలగవచ్చు. ఎక్కువసేపు హీల్స్ వేసుకోవడం వల్ల నడకలో సమతుల్యత కోల్పోయే ప్రమాదం కూడా ఉంటుంది. ముఖ్యంగా సరైన సైజు కాని పాదరక్షలు వాడితే సమస్యలు మరింత పెరుగుతాయి.

వైద్యుల సూచనల ప్రకారం, హీల్స్‌ను పూర్తిగా మానేయాల్సిన అవసరం లేకపోయినా వాటి వినియోగాన్ని పరిమితం చేయడం మంచిది. తక్కువ ఎత్తు ఉన్న హీల్స్‌ను ఎంచుకోవడం, అవసరమైన సందర్భాల్లో మాత్రమే ధరించడం మంచిదని సూచిస్తున్నారు. మిగతా సమయంలో సౌకర్యవంతమైన ఫ్లాట్ చెప్పులు వాడడం వల్ల పాదాలకు విశ్రాంతి లభిస్తుంది.

హీల్స్ వాడిన తర్వాత కాళ్లకు తేలికపాటి వ్యాయామాలు చేయడం, రక్తప్రసరణను మెరుగుపరచడం ద్వారా నొప్పి తగ్గించుకోవచ్చు. ఫ్యాషన్‌తో పాటు ఆరోగ్యాన్ని కూడా సమానంగా ప్రాధాన్యం ఇవ్వాలని నిపుణులు సూచిస్తున్నారు. సరైన జాగ్రత్తలు తీసుకుంటే స్టైల్‌ను కొనసాగిస్తూ ఆరోగ్యాన్ని కాపాడుకోవడం సాధ్యమే.