రాఘవ లారెన్స్…అతను తెలియని వారే ఉండరు.. అతను మంచి డ్యాన్సరే కాదు. ఆర్టిస్టు కూడా. అంతకు మించి మంచి మనసున్న వ్యక్తిగా గుర్తింపు పొందాడు. తన తల్లికి గుడి కట్టి.. తన లోని ప్రేమను చాటుకున్నాడు.తానే ఓ ట్రస్ట్ ఏర్పాటు చేసి అనాథలు, రైతులు, దివ్యాంగులు, మహిళలు, చిన్నారులకు హార్ట్ సర్జన్లు చేయిస్తున్నాడు. తను సంపాదించిన దాంట్లో కొంత మొత్తం దాతృత్వ కార్యక్రమాలకే ఉపయోగిస్తున్నాడు లారెన్స్. దానికి సంబంధించిన విశేషాలను సోషల్ మీడియా ద్వారా తన అభిమానులతో పంచుకుంటాడు లారెన్స్.
తాజాగా ఓ చిన్నారి హార్ట్ ఆపరేషన్ సక్సెస్ అయిన విషయాన్ని ఫేస్ బుక్ ద్వారా తెలియజేశాడు లారెన్స్. శివాని అనే బాలిక గుండెలో చిన్న రంధ్రం ఉంది. ఆ బాలికది నిరుపేద కుటుంబం. ఈ విషయం తెలుసుకున్న లారెన్స్.. చిన్నారికి ఆర్థిక సాయంతోపాటు బాలిక వైద్య చికిత్స అవసరం అయిన అన్ని వసతులను దగ్గరుండి మరీ చూశారు. ఆపరేషన్ చేయించారు. పాప ఇప్పుడు ఆరోగ్యంగా ఉంది. ఇప్పుడు బాలిక ఆస్పత్రి నుంచి డిశ్చార్జి అయ్యింది. ఈ విషయాన్ని చెబుతూ.. ‘మా 141వ ఓపెన్ హార్ట్ సర్జరీ విజయవంతమైంది! ఈమె శివాని. ఈమే వయసు ఒక సంవత్సరం. ఈమె గుండెలో చిన్న రంధ్రం ఉంది. ఆమెకు విజయవంతంగా ఆపరేషన్ చేయించి ఇంటికి పంపించాం. ఈ ఆపరేషన్‌లో పాల్గొన్న డాక్టర్ల బృందానికి, ఇతర సభ్యులకు మా ధన్యవాదాలు’ అని తన ఫేస్‌బుక్ పేజ్ లో పోస్ట్ చే శాడు లారెన్స్.
ఎవరైనా చిన్నపిల్లలు గుండె సంబంధిత సమస్యతో బాధపడుతూ, తల్లిదండ్రులు దగ్గర వైద్యం చేయించలేని పరిస్థితుల్లో ఉన్నట్లు మీకు తెలిస్తే తమకు తెలియజేయాలని లారెన్స్ కోరారు. దయచేసి “ది లారెన్స్ ఛారిటబుల్ ట్రస్ట్” ఫోన్ నంబర్లు 09790750784, 09791500866కు ఫోన్ చేసి విషయం తెలియజేయాలని విజ్ఞప్తి చేశారు.
