సాధారణ బ్యాక్ పెయిన్ అనుకుని వదిలేస్తున్నారా? కిడ్నీలు డ్యామేజ్ అయ్యే ప్రమాదం!

ఈ మధ్యకాలంలో చాలా మంది అకస్మాత్తుగా వచ్చే నడుము నొప్పిని సాధారణ సమస్యగా తీసుకుంటున్నారు. ఎక్కువసేపు కూర్చోవడం, తప్పుగా నిద్రపోవడం లేదా కండరాల ఒత్తిడి కారణంగా నొప్పి వచ్చిందనుకుంటూ పెయిన్ కిల్లర్స్ వేసుకుని నిర్లక్ష్యం చేస్తున్నారు. అయితే వైద్య నిపుణుల ప్రకారం ప్రతి నడుము నొప్పి కండరాల సమస్య వల్లే రావాల్సిన అవసరం లేదు. కొన్ని సందర్భాల్లో అది కిడ్నీ స్టోన్స్‌కు సంబంధించిన సంకేతం కూడా కావొచ్చని హెచ్చరిస్తున్నారు.

కిడ్నీ స్టోన్స్ వల్ల వచ్చే నొప్పి సాధారణ బ్యాక్ పెయిన్‌లా ఉండదని వైద్యులు చెబుతున్నారు. ఇది ఒక్కసారిగా ప్రారంభమై తీవ్రంగా ఉంటుంది. సాధారణంగా వెన్నెముక రెండు వైపులా, రిబ్స్ కింద భాగంలో నొప్పి మొదలై క్రమంగా పొత్తికడుపు లేదా తొడ భాగం వరకు వ్యాపించే అవకాశం ఉంటుంది. కొంతసేపు తగ్గినట్లు అనిపించినా మళ్లీ తీవ్రంగా రావడం ఈ నొప్పి ప్రత్యేకతగా చెబుతున్నారు.

వైద్యుల వివరణ ప్రకారం కిడ్నీలో ఏర్పడిన రాయి మూత్ర ప్రవాహాన్ని అడ్డుకోవడం వల్ల ఈ నొప్పి వస్తుంది. మూత్రం బయటకు వెళ్లకుండా అడ్డంకి ఏర్పడితే కిడ్నీపై ఒత్తిడి పెరిగి తీవ్రమైన నొప్పి కలుగుతుంది. రాయి చిన్నదైనా నొప్పి ఎక్కువగా ఉండొచ్చని నిపుణులు చెబుతున్నారు. అందుకే నొప్పి తీవ్రతను తేలికగా తీసుకోవద్దని సూచిస్తున్నారు.

కిడ్నీ స్టోన్స్ ఉన్నవారిలో నడుము నొప్పితో పాటు మరికొన్ని లక్షణాలు కూడా కనిపించవచ్చు. మూత్ర విసర్జన సమయంలో మంట, తరచూ మూత్రానికి వెళ్లాలనిపించడం, మూత్రంలో రక్తం కనిపించడం, వికారం, వాంతులు వంటి సమస్యలు ఉంటే వెంటనే వైద్యులను సంప్రదించాలని సూచిస్తున్నారు. ఈ లక్షణాలను నిర్లక్ష్యం చేస్తే ఇన్‌ఫెక్షన్ లేదా కిడ్నీ డ్యామేజ్ ప్రమాదం పెరిగే అవకాశం ఉందని హెచ్చరిస్తున్నారు.

ప్రస్తుతం కిడ్నీ స్టోన్స్ సమస్య నగర జీవనశైలిలో ఎక్కువగా కనిపిస్తోందని ఆరోగ్య నిపుణులు చెబుతున్నారు. తక్కువగా నీరు తాగడం, ఉప్పు ఎక్కువగా ఉన్న ఆహారం, అధిక ప్రోటీన్ ఫుడ్, ఊబకాయం, డయాబెటిస్ వంటి కారణాలు స్టోన్స్ ప్రమాదాన్ని పెంచుతున్నాయని పేర్కొంటున్నారు. ముఖ్యంగా వేసవిలో డీహైడ్రేషన్ కారణంగా ఈ సమస్య మరింత పెరిగే అవకాశముందని చెబుతున్నారు.

అయితే కిడ్నీ స్టోన్స్ చికిత్స ఇప్పుడు చాలా సులభంగా మారిందని వైద్యులు చెబుతున్నారు. చిన్న రాళ్లు మందులు, ఎక్కువగా నీరు తాగడం ద్వారా బయటకు వెళ్లే అవకాశం ఉంటుంది. పెద్ద రాళ్లకు లేజర్ లేదా ఎండోస్కోపిక్ విధానాలతో శస్త్రచికిత్సలు చేస్తున్నారు. ఇవి తక్కువ సమయంలో పూర్తవడంతో పాటు త్వరగా కోలుకునే అవకాశం కూడా ఉంటుందని వైద్య నిపుణులు చెబుతున్నారు.

నిపుణుల సూచన ప్రకారం అకస్మాత్తుగా వచ్చే తీవ్రమైన నడుము నొప్పిని నిర్లక్ష్యం చేయకుండా ముందుగానే పరీక్షలు చేయించుకోవడం చాలా ముఖ్యమని చెబుతున్నారు. సరైన సమయంలో చికిత్స తీసుకుంటే కిడ్నీ సంబంధిత తీవ్రమైన సమస్యలను నివారించవచ్చని సూచిస్తున్నారు.

Disclaimer: పై సమాచారం ఆరోగ్య అవగాహన కోసం మాత్రమే. ఏవైనా లక్షణాలు కనిపిస్తే వైద్య నిపుణులను సంప్రదించడం మంచిది.