Balagam Fame Lalitha Chiranjeevi : తెలంగాణ పల్లె వాతావరణం, సంస్కృతిని సహజంగా చూపించి సక్సెస్ అయ్యాడు దర్శకుడు వేణు. ఒక మనిషి చనిపోయినపుడు ఇంట్లోని కుటుంబ సభ్యుల పరిస్థితి ఎలా ఉంటుంది ఎలా ఫీల్ అవుతారు లాంటి విషయాలను చాలా సునిశితంగా చూపించారు. బలగం సినిమా తెలంగాణ, ఆంధ్రప్రదేశ్ అని కాకుండా దేశ విదేశాలలో చాలా మందికి నచ్చుతోంది. ఇక తెలంగాణ పల్లెల్లో అయితే గ్రామంలో అందరూ కలిసి సినిమా చూస్తూ ఎమోషనల్ అవుతున్నారు. అంతలా సినిమా అందరికీ కనెక్ట్ అయి ఆర్టిస్టులకు మంచి పేరు తెచ్చిపెట్టింది. అలా సినిమాలో హీరో పిన్నిగా గయ్యాళి పాత్రలో నటించిన లలిత చిరంజీవి గారు ఆమె వ్యక్తిగత జీవితం అలానే తన కెరీర్ గురించి మాట్లాడారు.
అవకాశం ఎలా వచ్చింది… ఎలా సెలెక్ట్ అయ్యానంటే…
సురభి కళాకారిణిగా గుర్తింపు ఉన్న లలిత గారు ఈ సినిమా ఆడిషన్స్ జరుగుతున్న సమయంలో ఒక తెలిసిన వ్యక్తి ద్వారా సమాచారం తెలిసి ఆడిషన్స్ కి వెళ్లారట. అయితే అప్పటికే పలు సినిమా అడిషన్స్ కి వెళ్లిన ఆమె ఆడిషన్స్ ఇవ్వడం రావడమే తప్ప సెలెక్ట్ అయ్యేది లేదనే భావనతోనే బలగం ఆడిషన్ కి వెళ్లారట. అక్కడ సురభి కళాకారిణి అని చెప్పగానే ఒక ఎమోషనల్ సీన్ చెప్పి చేయమన్నారట.
డైలాగులు ఇచ్చి చదువుకోమని చెప్పగా వెంటనే చెప్తానని లలిత అనడంతో ఆశ్చర్యపోయారట టీం. ఇక ఆమె సీన్ చేసినపుడు గ్లిజరిన్ లేకుండా సహజంగా ఏడవడంతో అందరూ ఫిదా అయ్యారట. అదీకాక ఆమె సహజంగా నటించడం పాత్రలో లీనమవడం నచ్చిందట. దీంతో మళ్ళీ వర్క్ షాప్ కి రమ్మని చెప్పారట. అలా వర్క్ షాప్ లో తనకు తోడికోడలు క్యారెక్టర్ కు వచ్చిన వాళ్లతో సీన్స్ ప్రాక్టీస్ జరిగేది అయితే చివర్లో వచ్చిన రూప లక్ష్మి గారు వర్క్ షాప్ కి వచ్చి చేయడం సెలెక్ట్ అయిపోవడం జరిగింది. సోషల్ నాటకాలు ఎక్కువ వేయడం, పేజీలకు పేజీలు డైలాగులు చెప్పడం అలవాటు ఉండటం అలాగే సహజంగా ఏడుపు రావడం వంటివి ప్రాక్టిస్ ఉండటం వల్ల సులువుగా నటించగలనని తెలిపారు లలిత.
