Balagam fame Muralidhar : ఉద్యోగంలో రిటైర్డ్ అయ్యాక నటన మీద ఆసక్తితో సీరియల్స్ వైపు వెళ్లి అలా సినిమాల్లోనూ అవకాశాల కోసం తిరుగుతూ చిన్న చిన్న సినిమాల్లో చిన్న పాత్రలను కూడా చేసిన మురళీధర్ గారు ‘డిజే టిల్లు’ సినిమాతో మంచి గుర్తింపు తెచ్చుకున్నారు. కథనాయకుడు, మహానాయకుడు, వినవయ్య రామయ్య, పిట్ట కథలు వంటి సినిమాల్లో నటించినా మరింత మంచి పేరు నటనకు తెచ్చింది మాత్రం ‘బలగం’ సినిమానే. చిన్న సినిమాగా వచ్చిన బలగం సినిమా నేడు రెండు రాష్ట్రాలోనూ సంచలన విజయాన్ని నమోదు చేసింది. నగరాలు, గ్రామాలు అని తేడా లేకుండా అన్ని రకాల ప్రేక్షకులను అలరిస్తున్న సినిమా బలగం. ఈ సినిమాలో నటించిన ప్రతి ఒక్క ఆర్టిస్టుకీ మంచి పేరు అలాగే గుర్తింపు తెచ్చిపెట్టింది. ఇక ఈ సినిమాలో నారాయణ పాత్రలో నటించిన మురళీధర్ గౌడ్ గారు సినిమా గురించి అందులో అవకాశం ఎలా వచ్చింది వంటి విషయాలను అలాగే తన కెరీర్ లో తాను పడిన ఇబ్బందులను ఇంటర్వ్యూలో పంచుకున్నారు.
తెలంగాణ భాష నాకు బలం…
మురళీధర్ గారు మొదట్లో సీరియల్స్ లో నటించారు. ఆ సమయంలోనే కొంతమంది స్నేహితులు నటన, గాత్రం, ఆహార్యం అన్నీ బాగున్నాయి సినిమాల్లో ప్రయత్నించు అని సలహాలు ఇచ్చారట. అలా సినిమాల్లో ప్రయత్నించినపుడు అవకాశాలు రాలేదట. కాకపోతే ఆయాచితంగా తాను ప్రయత్నించని సినిమా ప్రాజెక్ట్స్ లో అవకాశాలు వచ్చాయంటూ చెప్పారు. పిట్ట కథలు సినిమాలో తరుణ్ భాస్కర్ గారు నా వాచకం, నటనకు తీసుకున్నారు.
అలా తెలంగాణ భాష నాకు ప్లస్ అయింది. 50% భాష వల్ల అయితే 50% నా నటనతో గుర్తింపు తెచ్చుకున్నాను అంటూ బలగంలో నారాయణగా నటించిన మురళీధర్ గారు పేర్కొన్నారు. అంతకుముందు డిజే టిల్లు లో హీరో తండ్రి పాత్రలో ఇమిడి పోయిన ఆయన ప్రస్తుతం బలగంలో నారాయణ గా బాగా గుర్తింపు తెచ్చుకున్నారు. ఇక ఆయన వ్యక్తిగత విషయాలకి వస్తే ఆయనకు భార్య, ఇద్దరు కొడుకులు కాగా వాళ్ళు స్థిర పడి ముగ్గురు మనవళ్లు ఒక మనుమరాలితో చక్కని కుటుంబం ఉంది. దేవుడు నాకు అన్నీ ఇచ్చాడు అంటూ మురళీధర్ తెలిపారు.
