Balagam fame Muralidhar : తెలంగాణ పల్లె సంస్కృతిని చూపుతూ కుటుంబ బంధాలను చూపించిన సినిమా ‘బలగం’. చిన్న సినిమాగా మొదలై ఇప్పుడు మంచి వసూళ్లను రాబట్టడమే కాకుండా ఎంతో మంది సినిమాను చూసేలాగా సినిమా ఆకట్టుకుంది. అంతే కాకుండా సినిమా చూసి కొన్ని కుటుంబాలు కలిసిపోవడం అనేది చాలా గొప్ప విషయం. ఒక సినిమా మనుషులను ఇంత ప్రభావితం చేస్తుందా అనేలాగా బలగం సినిమా నేడు అందరినీ ఆలోచింపజేస్తోంది. ఇక ఈ సినిమాలో నారాయణ పాత్రలో నటించిన మురళీధర్ గౌడ్ గారు ఇంటర్వ్యూలో సినిమా గురించి పలు ఆసక్తికర విషయాలను పంచుకున్నారు.
డైరెక్టర్ చెప్పకపోయినా అలా చేశా…
బలగం సినిమా మొత్తం ఒకెత్తయితే సినిమా చివరి 20 నిముషాలు ఒకెత్తు. అందులోనూ కాకి పిండాన్ని ముట్టాలనే సీన్ లో కొమురమ్మ, మొగిలియ్యల పాట అందరినీ కంటతడి పెట్టిస్తుంది. ఆ పాటలో కుటుంబంలోని ప్రతి ఒక్కరి పేరు పలికే సమయంలో అల్లుడా నారాయణ అని పిలిచినపుడు నారాయణ పాత్రలో ఉన్న మురళీధర్ గారు తలపైకి ఎత్తి చూస్తారు ఆ సీన్ లో నిజానికి ఆయన అలా ఎత్తి చూడమని డైరెక్టర్ చెప్పలేదట.
ఇక వెంటనే కూతురు లచ్చవ్వ అనగానే ఆమె భుజం పై చేయి వేయగా ఆమె చూడలేదట అయితే మరో సారి చేయి వేసి నొక్కే సరికి రూప లక్ష్మి గారు తన చేయి నారాయణ చేతిలో వేయడం నారాయణ గారు ఆమె చేతులను పట్టుకుని ఎమోషనల్ అయ్యే సీన్ ఉంటుంది. ఇదంతా డైరెక్టర్ ముందుగా చెప్పింది కాదు. కాకపోతే పాత్రలో లీనం అయిపోవడం వల్ల అపటికప్పుడు నారాయణ పాత్రలో ఉన్న మురళీధర్ గారు చేశారట. కానీ థియేటర్లో ఆ సీన్ కి చాలా మంది కనెక్ట్ అయ్యారని మురళీధర్ గారు ఇంటర్వ్యూలో తెలిపారు. చాలా మంది ఆడపిల్లలు ఫోన్ చేసి ఆ సీన్ లో ఏడుపొచ్చిందని చెప్పారట.
