Balagam Fame Sujatha : కమెడియన్ వేణు గారు డైరెక్టర్ గా మారి ఒక మంచి ఫీల్ గుడ్ మూవీని తీశారు. కమెడియన్ కాబట్టి కామెడీ సినిమా తీస్తారని అందరూ అనుకున్నా అందుకు భిన్నంగా ఒక ఎమోషనల్ డ్రామాను చావుతో ముడిపడిన బంధాలను చూపించి ఆకట్టుకున్నాడు. చిన్న సినిమాగా వచ్చిన ‘బలగం’ సినిమా నేడు థియేటర్స్ లో డీసెంట్ కలెక్షన్స్ అందుకుంటోంది. అందులో నటించిన ఆర్టిస్టులందరికీ మంచి పేరు తెచ్చిపెట్టింది. అందులో నటించిన క్యారెక్టర్ ఆర్టిస్ట్ సుజాత సినిమా గురించి ప్రస్తుతం తనకు దక్కుతున్న ప్రశంసల గురించి తాజాగా ఒక ఇంటర్వ్యూలో పంచుకున్నారు.
నా డైలాగు కాపీ కొట్టారు…
బలగం సినిమా కంటే ముందు కొన్ని సినిమాలను చేసినా ఎవరూ అంతగా గుర్తించలేదని సుజాత తెలిపారు. బలగం సినిమా విడుదల అయ్యాక నేను అందులో చేశాను చూడండి అని చెప్పడం మర్చిపోయి ఆ సినిమా అందరూ చూడాల్సిన సినిమా, ప్రతి ఒక్కరికీ నచ్చుతుంది చూడండి అని చెప్పాను అంటూ సుజాత తెలిపారు. గోదావరిఖని నుండి హైదరాబాద్ సినిమా వరకు సాగిన ప్రయాణంలో డబ్బు కంటే గుర్తింపు ఆర్టిస్టుకి ఆనందాన్ని ఇస్తుందని బలగం సినిమా నాకు గుర్తింపునిచ్చిందని తెలిపారు.
మా ఊరిలోనే కాకుండా పలు చోట్ల మాకు సన్మానలు చేస్తున్నారని తెలిపారు. ఇక సినిమాలో ఒక పాట మాది కాపీ కొట్టారు, కథ మాది కాపీ కొట్టారు వంటి కామెంట్స్ చేస్తున్న వాళ్ళ గురించి మాట్లాడుతూ వాళ్ళ విషయాలన్నీ నాకు తెలియవు కానీ నేను వర్షంతో మాట్లాడుతుంటా, నువ్వు ఇప్పుడు రా అనడం వర్షంతో ఆడుకోవడం వంటివి ఇప్పటికీ పిల్లలున్నా చేస్తుంటా, అలాగని ‘వర్షం’ సినిమాలో త్రిష డైలాగులు నావి కాపీ కొట్టారని అనలేను కదా. ఒక మంచి సినిమా వస్తే ఇలాంటివి ఇంకా రావాలని కొట్టుకోవాలి కానీ ఇది కాపీ అంటూ మాట్లాడితే ఎలా అంటూ అభిప్రాయపడ్డారు సుజాత.
