Balagam Mogilayya : తెలంగాణ పల్లె వాతావరణం, సంస్కృతిని సహజంగా చూపించి సక్సెస్ అయ్యాడు దర్శకుడు వేణు. ఒక మనిషి చనిపోయినపుడు ఇంట్లోని కుటుంబ సభ్యుల పరిస్థితి ఎలా ఉంటుంది ఎలా ఫీల్ అవుతారు లాంటి విషయాలను చాలా సునిశితంగా చూపించారు. బలగం సినిమా తెలంగాణ, ఆంధ్రప్రదేశ్ అని కాకుండా దేశ విదేశాలలో చాలా మందికి నచ్చుతోంది. ఇక తెలంగాణ పల్లెల్లో అయితే గ్రామంలో అందరూ కలిసి సినిమా చూస్తూ ఎమోషనల్ అవుతున్నారు. అంతలా సినిమా అందరికీ కనెక్ట్ అయి ఆర్టిస్టులకు మంచి పేరు తెచ్చిపెట్టింది. ఎన్నో ఏళ్లుగా సినిమా ఇండస్ట్రీలో ఉన్నా కూడా అంతగా రాని గుర్తింపు ఈ ఒక్క సినిమాతో చాలా మంది ఆర్టిస్టులకు వచ్చింది. అలా మొగిలయ్య కొమరమ్మ లకు ఈ సినిమా ద్వారా మంచి గుర్తింపు వచ్చింది.
అనారోగ్యంతో బాధపడుతున్న మొగిలయ్య…
బలగం సినిమా అంతా ఒకెత్తయితే చివర్లో వచ్చే పాట చూసిన ప్రేక్షకులందరినీ కంట తడి పెట్టించింది. సినిమా క్లైమాక్స్ లో ఆ పాటలో లీనమైపోతాం. మనకు తెలియకుండానే ఆ పాటకు కనెక్ట్ అయి మన కుటుంబం గుర్తొస్తుంది. అంత అద్భుతంగా పాట పాడిన కళాకారులు మొగిలయ్య, కొమరమ్మ లకు అందరూ ఫిదా అయ్యారు. ఎక్కడ బాలగం సక్సెస్ మీట్ జరిగినా అక్కడ వారి ప్రస్తావన ఉంటోంది. ఆ పాట వల్ల తగాదాలు పడుతూ వేరుగా ఉంటోన్న కొన్ని కుటుంబాలు కలిసిపోవడం కూడా జరిగింది. అలాంటి పాట పాడిన మొగిలయ్య కిడ్నీ సమస్యలతో బాధపడుతున్నాడు.
డయాలసిస్ ఖచ్చితంగా జరిపించాలి, అందుకు అతని ఆర్థిక పరిస్థితి చాలదు. బలగం సినిమా తరువాత కొంతమంది ప్రముఖులు ముందుకు వచ్చి ఆయనకు సహాయం చేస్తున్నా వైద్యంకి అయ్యే ఖర్చు వల్ల మరింతమంది తనకు చేయూత ఇవ్వాలంటూ మొగిలయ్య ఆసుపత్రి బెడ్ మీద నుండే కోరుకుంటున్నాడు. ప్రస్తుతం కొంతమంది రాజకీయ ప్రముఖులు కూడా మొగిలియ్యను బ్రతికుంచుకోవడానికి ఆర్థిక సహాయం అందిస్తున్నారు.
