మన పూర్వీకులు బలంగా, ఆరోగ్యంగా జీవించడానికి కారణమైన ఆహారాల్లో ఒకటి జొన్నతో తయారయ్యే వంటకాలు. ముఖ్యంగా జొన్న సంగటి లేదా జొన్న అన్నం గ్రామీణ జీవనశైలిలో కీలక భాగంగా ఉండేది. పోషకాలు పుష్కలంగా ఉండే ఈ ఆహారం శరీరానికి శక్తిని అందించడంతో పాటు జీర్ణక్రియను మెరుగుపరుస్తుంది. అందుకే అప్పటి తరాలు రోగాల బారిన పడకుండా ఆరోగ్యంగా ఉండగలిగాయని పెద్దలు చెబుతుంటారు.
జొన్నలో ఫైబర్, ప్రోటీన్, ఐరన్ వంటి ముఖ్యమైన పోషకాలు అధికంగా ఉంటాయి. ఇవి శరీరానికి అవసరమైన శక్తిని నెమ్మదిగా విడుదల చేస్తూ ఎక్కువసేపు తృప్తి కలిగిస్తాయి. ముఖ్యంగా షుగర్, బరువు నియంత్రణలో కూడా జొన్న ఆహారం సహాయపడుతుందని నిపుణులు చెబుతున్నారు. అందుకే నేటి జీవనశైలిలో కూడా ఈ పాతకాలపు ఆహారాన్ని తిరిగి అలవాటు చేసుకోవాలని వైద్యులు సూచిస్తున్నారు.
జొన్న సంగటి తయారీ కూడా అంత కష్టమైన ప్రక్రియ కాదు. ముందుగా జొన్నలను శుభ్రంగా కడిగి రాత్రంతా నానబెట్టాలి. తరువాత వాటిని కొద్దిగా ఆరబెట్టి, మిక్సీలో రవ్వలా గ్రైండ్ చేసుకోవాలి. మరీ మెత్తగా కాకుండా కొద్దిగా పలుకులా ఉండేలా చేసుకోవడం మంచిది. ఆ తర్వాత నీరు మరిగించి, అందులో ఉప్పు వేసి, ఈ జొన్న రవ్వను కొద్దికొద్దిగా వేస్తూ ఉండలు కాకుండా కలుపుతూ ఉడికించాలి. తక్కువ మంటపై బాగా ఉడికించి, చిక్కగా మారిన తర్వాత దింపితే జొన్న సంగటి సిద్ధమవుతుంది.
ఈ సంగటికి కాంబినేషన్గా టమాటో తొక్కు చాలా రుచిగా ఉంటుంది. ముందుగా పచ్చిమిర్చిని స్వల్పంగా వేయించి, తరువాత టమాటోలను నూనెలో మెత్తగా ఉడికించాలి. అందులో చింతపండు, ఉప్పు, పసుపు, కొత్తిమీర వేసి కొద్దిసేపు ఉడికించాలి. చివరగా పచ్చిమిర్చి, వెల్లుల్లి, జీలకర్రతో పాటు ఈ మిశ్రమాన్ని మిక్సీలో కచ్చా పచ్చాగా గ్రైండ్ చేస్తే రుచికరమైన టమాటో తొక్కు సిద్ధమవుతుంది.
వడ్డించే సమయంలో జొన్న సంగటిని ముద్దలుగా చేసి, పక్కన టమాటో తొక్కుతో పాటు కొద్దిగా నెయ్యి కలిపి తింటే రుచి మరింత పెరుగుతుంది. పప్పు, చారు లేదా నాన్ వెజ్ కూరలతో కూడా ఇది బాగా సరిపోతుంది.
మొత్తంగా, ఆరోగ్యకరమైన జీవనశైలికి జొన్న సంగటి ఒక ఉత్తమ ఎంపికగా చెప్పొచ్చు. పాతకాలపు ఆహారాన్ని మళ్లీ మన రోజువారీ జీవితంలో చేర్చుకుంటే ఆరోగ్యానికి ఎంతో మేలు జరుగుతుంది.
