సినిమా టికెట్ల ఆన్ లైన్ విధానాన్ని తీవ్రంగా వ్యతిరేకిస్తున్న పవన్ కళ్యాణ్… నిన్న రిపబ్లిక్ చిత్రం ప్రీ రిలీజ్ వేడుకలో ఏపీ ప్రభుత్వంపై విరుచుకుపడ్డాడు. దీంతో ఏపీ మంత్రులు పవన్ పై నానా రకాలుగా మాట్లాడారు. యుద్దానికి ప్రతి యుద్దం అన్నట్లు మాటల యుద్ధం సాగింది. ఈ క్రమంలో పవన్ వ్యాఖ్యలపై తెలుగు ఫిలిం చాంబర్ ఆఫ్ కామర్స్ స్పందించింది.
ఆ వ్యాఖ్యలు పవన్ కళ్యాణ్ వ్యక్తిగతం అని స్పష్టం చేసింది. పవన్ చేసిన వ్యాఖ్యలతో ఫిలిం చాంబర్ కు సంబంధం లేదని వెల్లడించింది. చిత్ర పరిశ్రమపై ఆధారపడి వేల కుటుంబాలు ఉన్నాయని, కొందరు వ్యక్తిగత అభిప్రాయాలను పలు వేదికలపై వెల్లడిస్తున్నారని తెలిపింది.
టాలీవుడ్ పై ఒక్కొక్కరికి ఒక్కో అభిప్రాయం ఉంటుందని, అలాంటి అభిప్రాయాలతో తమకు సంబంధంలేదని ఫిలిం చాంబర్ వివరణ ఇచ్చింది. తెలుగు సినీ పరిశ్రమలకు రెండు రాష్ట్ర ప్రభుత్వాల మద్దతు ముఖ్యమని తెలిపింది. ప్రభుత్వాల మద్ధతు లేనిది సినీ పరిశ్రమ మనుగడ సాగించడం కష్టమని స్ఫష్టం చేసింది. పవన్ కళ్యాణ్ వ్యాఖ్యలపై ఇప్పటికే తీవ్ర దుమారం రేపుతున్న సందర్భంలో ఫిలిం చాంబర్ తాజా వ్యాఖ్యలు ప్రాధాన్యతను సంతరించుకున్నాయి.
సినీ రంగ ఇబ్బందులపై ఏపీ మంత్రి పేర్ని నానితో చర్చించామని, సీఎం జగన్ కూడా సానుకూలంగా స్పందించారని తెలుగు ఫిలిం చాంబర్ ఆఫ్ కామర్స్ తన ప్రకటనలో వెల్లడించింది. సినీ పరిశ్రమకు తెలుగు రాష్ట్రాలు రెండు కళ్లు అని ఇరు రాష్ట్రాల ప్రభుత్వాల మద్దతు సినీ పరిశ్రమకు అవసరం అంటూ కోరారు.
