చైల్డ్ షెల్టర్ హోమ్‌లో ఘోరం.. HIV బాధిత బాలికను కూడా వదలని కామాంధులు!

మహారాష్ట్ర, లాతూర్ జిల్లా: మహారాష్ట్రలోని లాతూర్ జిల్లా ఔసా తాలూకాలో ఉన్న హసేగావ్ గ్రామంలో ఓ చైల్డ్ షెల్టర్ హోమ్‌లో గుండెను కలిచివేసే ఘోర ఘటన వెలుగు చూసింది. సేవాలయ్ అనే ఆశ్రమంలో ఉన్న హెచ్‌ఐవి బాధిత మైనర్ బాలికపై అక్కడ పని చేస్తున్న ఉద్యోగి అమిత్ మహాముని అనేకసార్లు అత్యాచారం చేశాడు. 2023 జూలై 13 నుంచి 2025 జూలై 23 వరకు అంటే దాదాపు రెండు సంవత్సరాలపాటు అతడు బాలికపై లైంగిక దాడులకు పాల్పడినట్లు వివరాలు వెల్లడయ్యాయి. ఈ దుర్మార్గం బయటపెడితే తీవ్ర పరిణామాలు ఉంటాయని ఆమెను బెదిరిస్తూ మానసికంగా కూడా వేధించాడు.

ఆశ్రమ యాజమాన్యం నిర్లక్ష్యం, అక్రమ గర్భస్రావం

ధైర్యం చేసి బాలిక ఓ రోజు తన బాధను షెల్టర్ హోమ్ అధికారులకు లేఖ ద్వారా తెలియజేయాలనుకుంది. కానీ బాధితురాలిని రక్షించాల్సిన ఆశ్రమ యాజమాన్యం ఆ లేఖను చింపేసి, మౌనంగా వ్యవహరించింది. దీంతో పరిస్థితి మరింత దారుణంగా మారింది. బాలిక ఆరోగ్యం క్షీణించి ఆసుపత్రికి తరలించగా ఆమె ఇప్పటికే నాలుగు నెలల గర్భవతిగా ఉన్నట్లు వైద్యులు వెల్లడించారు. దీంతో ఆశ్రమంలో ఉన్న దుర్మార్గాలు బయటపడ్డాయి. బాలిక అనుమతి లేకుండా బలవంతంగా గర్భస్రావం చేయించడం మరింత కలత కలిగించే విషయం. ఈ అక్రమ గర్భస్రావాన్ని పూజా వాఘ్మారే అనే వైద్యురాలు నిర్వహించగా, ఆమెను కూడా పోలీసులు అరెస్టు చేశారు.

పోలీసుల చర్యలు, నిందితుల అరెస్ట్

ధైర్యం చేసిన బాలిక చివరకు ధరశివ్ జిల్లాలోని ధోకి పోలీస్ స్టేషన్‌లో ఫిర్యాదు చేయడంతో పోలీసులు వెంటనే స్పందించారు. సేవాలయ్ షెల్టర్ వ్యవస్థాపకుడు రవి బాపట్లే, సూపరింటెండెంట్ రచనా బాపట్లే, ప్రధాన నిందితుడు అమిత్ మహాముని, గర్భస్రావం చేసిన డాక్టర్ పూజా వాఘ్మారేలను పోలీసులు అదుపులోకి తీసుకున్నారు. కేసును ఔసా పోలీస్ స్టేషన్‌కు బదిలీ చేశామని లాతూర్ ఎస్పీ అమోల్ తంబే తెలిపారు. ప్రస్తుతం కేసు విచారణ ముమ్మరంగా కొనసాగుతోంది.

స్థానికుల ఆగ్రహం, కఠిన చర్యలకు డిమాండ్

ఇలాంటి కేంద్రాలు మైనర్ పిల్లలకు రక్షణ కల్పించాల్సిన చోటవ్వగా, అలాంటి ప్రదేశాల్లోనే ఇలాంటి దారుణాలు చోటుచేసుకోవడం పట్ల స్థానికులు తీవ్ర ఆగ్రహం వ్యక్తం చేస్తున్నారు. ఈ ఘటనను తీవ్రంగా తీసుకున్న పోలీసులు ఇతర బాలికల నుంచి కూడా విచారణ చేపట్టి మరెవ్వరూ ఇలాంటి హింసకు గురికాకుండా కఠిన చర్యలు తీసుకుంటామని స్పష్టం చేశారు.