ప్రస్తుతం నగదు లావాదేవీల కంటే డిజిటల్ చెల్లింపులు, క్రెడిట్ కార్డుల వినియోగం వేగంగా పెరుగుతోంది. రోజువారీ ఖర్చులు, అత్యవసర అవసరాలు, ఆన్లైన్ షాపింగ్ వంటి అనేక కారణాల వల్ల ప్రజలు క్రెడిట్ కార్డులను విస్తృతంగా ఉపయోగిస్తున్నారు. అయితే కార్డు వినియోగం సులభంగా అనిపించినా, దానికి సంబంధించిన నియమాలు, బాధ్యతలపై చాలామందికి సరైన అవగాహన ఉండదు. ముఖ్యంగా కార్డ్ హోల్డర్ మరణించిన తర్వాత ఆ బకాయి ఎవరు చెల్లించాలి అనే అంశం చాలా మందిలో సందేహాలను రేకెత్తిస్తోంది.
సాధారణంగా క్రెడిట్ కార్డు ఒక ‘అనసెక్యూర్డ్ లోన్’ కిందకు వస్తుంది. అంటే దీనికి ఎలాంటి పూచీకత్తు ఉండదు. బంగారం రుణం, గృహ రుణం వంటి వాటిలా ఆస్తులు బాండుగా పెట్టాల్సిన అవసరం ఉండదు. అందువల్ల క్రెడిట్ కార్డు ద్వారా చేసిన ఖర్చుల బాధ్యత పూర్తిగా కార్డు యజమానిపైనే ఉంటుంది. బ్యాంక్తో ఒప్పందం కూడా అదే వ్యక్తి పేరుతో ఉంటుంది.
క్రెడిట్ కార్డు వినియోగదారుడు మరణించిన సందర్భంలో పరిస్థితి కొంత భిన్నంగా ఉంటుంది. చట్టపరంగా చూస్తే, ఆ బకాయిని నేరుగా కుటుంబ సభ్యులు తప్పనిసరిగా చెల్లించాల్సిన అవసరం లేదు. అంటే భార్య, భర్త, పిల్లలు లేదా ఇతర వారసులపై బ్యాంకులు నేరుగా ఒత్తిడి చేయలేవు. అయితే దీనికి కొన్ని ప్రత్యేక పరిస్థితులు కూడా ఉంటాయి.
ఒకవేళ ఆ వ్యక్తికి ఆస్తులు ఉంటే, బ్యాంకులు ఆ బకాయిని ఆస్తుల ద్వారా వసూలు చేసుకునే అవకాశం ఉంటుంది. అంటే మృతుడి పేరుమీద ఉన్న స్థిరాస్తులు, బ్యాంక్ బ్యాలెన్స్ లేదా ఇతర ఆర్థిక వనరుల నుంచి అప్పు తీర్చుకునే హక్కు బ్యాంకులకు ఉంటుంది. అయితే వారసులు తమ వ్యక్తిగత డబ్బుతో ఆ బకాయిని చెల్లించాల్సిన బాధ్యత ఉండదు.
ఇక జాయింట్ అకౌంట్ లేదా అదనపు కార్డు (అడిషనల్ కార్డ్) ఉన్న సందర్భాల్లో మాత్రం పరిస్థితి మారుతుంది. ఒకే ఖాతాకు సంబంధించిన ఇద్దరు లేదా అంతకంటే ఎక్కువ మంది ఉన్నట్లయితే, మిగిలిన వ్యక్తిపై బాధ్యత పడే అవకాశం ఉంటుంది. అలాగే గ్యారంటీ ఇచ్చిన వారు ఉన్నట్లయితే, వారు కూడా ఆ అప్పు విషయంలో బాధ్యత వహించాల్సి రావచ్చు.
ఇలాంటి సమస్యలు తలెత్తకుండా ఉండాలంటే క్రెడిట్ కార్డు వినియోగంలో జాగ్రత్తలు అవసరం. ఖర్చులు నియంత్రణలో ఉంచడం, బిల్లులు సమయానికి చెల్లించడం, కుటుంబ సభ్యులకు ఆర్థిక విషయాలపై స్పష్టమైన సమాచారం ఇవ్వడం చాలా ముఖ్యం. అవసరమైతే ఇన్సూరెన్స్ లేదా ప్రొటెక్షన్ ప్లాన్లను కూడా పరిశీలించవచ్చు.
మొత్తానికి, క్రెడిట్ కార్డు ఉపయోగం ఎంత సౌకర్యంగా ఉన్నా, దానికి సంబంధించిన బాధ్యతలు కూడా అంతే ముఖ్యమైనవి. సరైన అవగాహనతో ఉపయోగిస్తే సమస్యలు తలెత్తవు. ముఖ్యంగా అత్యవసర పరిస్థితుల్లో కుటుంబ సభ్యులు ఇబ్బందులు పడకుండా ముందుగానే స్పష్టమైన ఆర్థిక ప్రణాళికలు సిద్ధం చేసుకోవడం ఉత్తమం.
