సినిమా ఓ రంగుల ప్రపంచం.. చూడటం వరకే మన చేతుల్లో ఉంటుంది.ఒకసారి సినిమా చూసిన తర్వాత ఆ రంగుల ప్రపంచంలో నుంచి విముక్తులు కావడం అంత సులువు కాదు. అలా ఎంతో మంది కలలు కని ఆరాధించి సినిమా తమ శ్వాసగా, ప్రాణంగా అభిమానించి, ఆ సినీ జగత్తులో ఇసుక రేణువునైనా సరిపోతుందని కష్ట నష్టాలను భరిస్తూ.. అనుకున్న లక్ష్యాన్ని చేరిన దర్శకుడు కరుణాకరన్. చెన్నైలో పాండీ బజార్ లో తిరుగుతూ దర్శకులకు నిర్మాతలకు తను కలలుకంటూ రాసుకున్న కథను వినిపిస్తూ ఉండేవాడు. అలా పాండీ బజార్ లో అనుకోకుండా ఒక హోటల్ లో టాలీవుడ్ కు చెందిన పవన్ కళ్యాణ్ ఫోటోను ఒక మ్యాగజైన్ పై చూసి తన కథకు సరిగ్గా సరిపోతాడనుకున్నాడు.
అనుకున్నదే తడవుగా ఆయన హైదరాబాదుకు ప్రయాణమై అష్టకష్టాలు పడి పవన్ కళ్యాణ్ అపాయింట్ మెంట్ సంపాదించగలిగాడు. అలా తను చెప్పిన ప్రేమ కథకు పవన్ కళ్యాణ్ గ్రీన్ సిగ్నల్ ఇచ్చాడు. అలా పవన్ కళ్యాణ్ ఒప్పుకోవడంతో ఒక్కసారిగా ఎడారిలో బిస్లరీ వాటర్ దొరికినట్టుగా కరుణాకరన్ ఫీల్ అయ్యాడు. కథలో అత్యంత ప్రాధాన్యం ఉన్నా పాత్ర హీరో చెల్లెలు పాత్ర. అప్పుడు తనకు సరిగ్గా తమిళ్ సీరియల్ లో నటిస్తున్న వాసుకి గుర్తుకొచ్చారు. కానీ వాసుకి అప్పటికే తాను సినిమాల్లో నటించనని భీష్మించుకుని కూర్చుంది. విజయ్ కాంత్ హీరోగా నటిస్తున్న సినిమాలో సపోర్టింగ్ క్యారెక్టర్ కోసం వాసుకి ఆఫర్ వచ్చింది. అప్పటికే ఖుషి సినిమా దర్శకుడు ఎస్.జె.సూర్య ఒక కథ చెప్పి వెళ్లిపోయారు. ఆ తరువాత దర్శకుడు కరుణాకరన్ వెళ్లి వాసుకిని కలిశారు. వాసుకి లోలోపల కరుణాకరన్ ఎలా కథ చెప్పినా కూడా.. నేను సినిమాలో నటించినని మనసులో అనుకుంది.
వాసుకి, కరుణాకర్ చెప్పే ప్రేమకథ వినడం మొదలు పెట్టింది. ఆ కథ ఆయన దాదాపు ఏడు సంవత్సరాల నుంచి ఎంతో స్ట్రగుల్ చేసి ఆ కథను రాసుకున్న విధానం వాసుకి ఎంతగానో నచ్చింది. ఈ సినిమా ఎవరితో తీస్తున్నావని అడగగా పవన్ కళ్యాణ్ తో తెలుగులో ఈ ప్రేమ కథ తీస్తున్నానని కరుణాకర్ చెప్పారు. కానీ కరుణాకరన్ ఆ కథ చెప్పే నాటికి నిజంగా తనకు పవన్ కళ్యాణ్ అంటే ఎవరో తెలియదన్నారు. తాను ఎక్కువగా తమిళ్ సినిమాలు, సీరియల్స్ చూసేదానినని, అలా పవన్ కళ్యాణ్ అప్పటికీ నాకు తెలియదని ఆమె ఈ మధ్య కాలంలో ఒక ఇంటర్వ్యూలో చెప్పుకొచ్చారు. అలా1998లో కరుణాకరన్ దర్శకత్వంలో వచ్చిన “తొలిప్రేమ”చిత్రం విడుదలై ఘన విజయం సాధించింది.ఇందులో పవన్ కళ్యాణ్ చెల్లెలిగా నటించిన వాసుకి తెలుగులో మంచి పేరు వచ్చింది.
