ఇటీవల సోషల్ మీడియాలో “2026 నుంచి కొత్త అద్దె నిబంధనలు అమల్లోకి వచ్చాయి” అనే ప్రచారం విస్తృతంగా కనిపిస్తోంది. ఈ పోస్టులను చూసి చాలా మంది ఇంటి యజమానులు, అద్దెదారులు గందరగోళానికి గురవుతున్నారు. అయితే నిపుణుల ప్రకారం, ఈ వార్తల్లో నిజం పూర్తిగా లేదని స్పష్టం చేస్తున్నారు.
వాస్తవానికి ఈ ప్రచారంలో పేర్కొంటున్న నిబంధనలు కొత్తవి కావు. ఇవి కేంద్ర ప్రభుత్వం 2021లో ఆమోదించిన మోడల్ టెనెన్సీ చట్టానికి చెందిన మార్గదర్శకాలే. ఈ చట్టం దేశవ్యాప్తంగా నేరుగా అమలయ్యే విధంగా రూపొందించబడలేదు. ఇది కేవలం ఒక నమూనా చట్టం మాత్రమే. దీనిని అమలు చేయాలా వద్దా అనేది పూర్తిగా రాష్ట్ర ప్రభుత్వాల నిర్ణయంపై ఆధారపడి ఉంటుంది.
ఈ మోడల్ చట్టంలో కొన్ని ముఖ్యమైన సూచనలు ఉన్నాయి. అద్దెదారులు చెల్లించే సెక్యూరిటీ డిపాజిట్‌ను పరిమితం చేయడం, అద్దె ఒప్పందాలను తప్పనిసరిగా లిఖితపూర్వకంగా నమోదు చేయించడం, అద్దె పెంపుపై నియంత్రణ విధించడం వంటి అంశాలు అందులో ఉన్నాయి. అదనంగా, అద్దెదారులు మరియు ఇంటి యజమానుల మధ్య తలెత్తే వివాదాలను త్వరగా పరిష్కరించేందుకు ప్రత్యేక కోర్టులు ఏర్పాటు చేసే ప్రతిపాదన కూడా ఇందులో భాగం.
ఇంటి యజమానులు ముందస్తు సమాచారం ఇవ్వకుండా అద్దెదారుల ఇంట్లోకి ప్రవేశించకూడదని, అద్దె ఒప్పందం రద్దు చేసే విధానం కూడా స్పష్టంగా ఉండాలని ఈ చట్టం సూచిస్తుంది. దీని ద్వారా అద్దె వ్యవస్థలో పారదర్శకత పెరగడంతో పాటు, ఇరు వర్గాల హక్కులు రక్షించబడతాయని నిపుణులు అభిప్రాయపడుతున్నారు.
అయితే ఈ నిబంధనలు దేశంలోని అన్ని రాష్ట్రాల్లో ఒకేసారి అమల్లోకి రావు. ప్రతి రాష్ట్రం తన అవసరాలకు అనుగుణంగా ఈ చట్టాన్ని స్వీకరించవచ్చు లేదా మార్పులు చేసి అమలు చేయవచ్చు. ప్రస్తుతం కొన్ని రాష్ట్రాలు మాత్రమే ఈ దిశగా చర్యలు తీసుకున్నాయి.
భారతదేశంలో అద్దె వ్యవస్థ చాలా వరకు అనధికారికంగా నడుస్తున్న నేపథ్యంలో, ఈ చట్టం ఒక మార్గదర్శకంగా ఉపయోగపడుతుందని నిపుణులు చెబుతున్నారు. అయితే సోషల్ మీడియాలో ప్రచారం అవుతున్నట్లుగా వెంటనే దేశవ్యాప్తంగా కొత్త నిబంధనలు అమల్లోకి వచ్చాయని భావించడం సరైంది కాదని వారు స్పష్టం చేస్తున్నారు
