Balagam fame Kota Jayaram : తెలంగాణ పల్లె వాతావరణం, సంస్కృతిని సహజంగా చూపించి సక్సెస్ అయ్యాడు దర్శకుడు వేణు. ఒక మనిషి చనిపోయినపుడు ఇంట్లోని కుటుంబ సభ్యుల పరిస్థితి ఎలా ఉంటుంది, ఎలా ఫీల్ అవుతారు లాంటి విషయాలను చాలా సునిశితంగా చూపించారు. బలగం సినిమా తెలంగాణ, ఆంధ్రప్రదేశ్ అని కాకుండా దేశ విదేశాలలో చాలా మందికి నచ్చుతోంది. ఇక తెలంగాణ పల్లెల్లో అయితే గ్రామంలో అందరూ కలిసి సినిమా చూస్తూ ఎమోషనల్ అవుతున్నారు. అంతలా సినిమా అందరికీ కనెక్ట్ అయి ఆర్టిస్టులకు మంచి పేరు తెచ్చిపెట్టింది. ఎన్నో ఏళ్లుగా సినిమా ఇండస్ట్రీలో ఉన్నా కూడా అంతగా రాని గుర్తింపు ఈ ఒక్క సినిమతో చాలా మంది ఆర్టిస్టులకు వచ్చింది. అలా సినిమాలో హీరోకి తండ్రిగా నటించిన కోట జయరాం గారు బాగా ఫేమస్ అయ్యారు. ప్రస్తుతం సక్సెస్ ను ఎంజాయ్ చేస్తున్న ఆయన పలు ఇంటర్వ్యూలలో పాల్గొంటూ ఆయన కెరీర్ గురించి మాట్లాడారు.
సినిమాకు నేనే హీరో…
బలగం సినిమాలో హీరో సాయిలు కి తండ్రిగా కొమరయ్య కొడుకుగా ఐలయ్య పాత్రలో నటించిన జయరాం గారి నటన ఆకట్టుకుంది. ఆ పాత్ర గురించి సినిమా గురించి మాట్లాడుతూ సినిమా మొత్తం ఉండే పాత్రలో మొదటి సారి చేసాను అంటూ చెప్పారు. ఒకరకంగా చెప్పాలంటే సినిమాకు హీరో నేనే అనొచ్చు, బావతో గొడవ పడటం, మళ్ళీ చెల్లి కోసం ఏడవడం, ఇక తమ్ముడితో తగాదా ఇలా ప్రతి సంఘటన నాతో ముడిపడి ఉన్నాయి.
ఇందులో హీరో హీరోయిన్లు గా ఉన్న సాయిలు, సంధ్య కి పాట ఉందేమో నా పాత్రకు అలా పాటలు లేవు అంతే సినిమా మొత్తం నా చుట్టూ నడుస్తుంది అందుకే సినిమాకు నేనే హీరో అనిపించింది. అది కూడా షూటింగ్ అపుడు అనిపించలేదు కానీ సినిమా చూస్తున్నపుడు ప్రతి సీన్ లో నేనున్నాను, కథలో కీలక పాత్ర కదా నాది అన్నపుడు చాలా ఆనందంగా అనిపించింది అంటూ చెప్పారు జయరాం.
