సినిమా రంగంలో హీరోలు, హీరోయిన్లు మాత్రమే కాదు… దర్శకులు, రచయితలు కూడా అప్పుడప్పుడు తెరపై కనిపిస్తూ ప్రేక్షకులను ఆశ్చర్యపరుస్తుంటారు. ముఖ్యంగా తమ కెరీర్ ప్రారంభ దశలో చాలా మంది దర్శకులు చిన్న చిన్న పాత్రల్లో నటించి ఉంటారు. అలాంటి ఓ ఆసక్తికరమైన త్రోబ్యాక్ ఫొటో ఇప్పుడు సోషల్ మీడియాలో విపరీతంగా వైరల్ అవుతోంది. ఆ ఫొటోలో కనిపిస్తున్న వ్యక్తి ఎవరో తెలుసుకునేందుకు నెటిజన్లు ఆసక్తిగా చర్చించుకుంటున్నారు.
ఆ ఫొటోలో ఉన్న వ్యక్తి ఇప్పుడు తెలుగు సినిమా పరిశ్రమలో ప్రముఖ దర్శకుడిగా పేరు సంపాదించాడు. తెలంగాణకు చెందిన ఈ దర్శకుడు చిన్నప్పటి నుంచే కళలపై ఆసక్తి పెంచుకుని స్టేజ్ ఆర్టిస్టుగా తన ప్రయాణాన్ని ప్రారంభించాడు. నాటకాలలో పాల్గొంటూ నటనపై పట్టు సాధించాడు. ఆ అనుభవమే తర్వాత ఆయనను సినీ రంగం వైపు తీసుకువచ్చింది.
సినిమాలపై ఉన్న ఆసక్తితో రచయితగా తన కెరీర్ను ప్రారంభించిన ఆయన, ప్రముఖ రచయిత యండమూరి రవీంద్రనాథ్ రచనల ప్రభావంతో సినీ ప్రపంచంలోకి అడుగుపెట్టాడు. కథలు, సంభాషణలు రాయడంలో నైపుణ్యం చూపుతూ పలువురు ప్రముఖ దర్శకులతో కలిసి పనిచేశాడు. కోనా వెంకట్, పూరి జగన్నాథ్, రామ్ గోపాల్ వర్మ వంటి దర్శకుల దగ్గర సహాయ దర్శకుడిగా పని చేస్తూ సినీ నిర్మాణ ప్రక్రియపై పూర్తి అవగాహన సంపాదించాడు.
ఈ ప్రయాణంలో భాగంగా ‘నిన్నే ఇష్టపడ్డాను’, ‘నా ఆటోగ్రాఫ్’, ‘ఏ ఫిల్మ్ బై అరవింద్’, ‘బుజ్జిగాడు’, ‘చింతకాయల రవి’, ‘కొంచెం ఇష్టం కొంచెం కష్టం’, ‘నిప్పు’ వంటి అనేక చిత్రాలకు రచయితగా పని చేసి గుర్తింపు పొందాడు. తర్వాత దర్శకత్వం వైపు అడుగుపెట్టి మాస్ మహారాజా రవితేజతో కలిసి ఒక క్రైమ్ థ్రిల్లర్ చిత్రాన్ని తెరకెక్కించాడు. ఆ సినిమా ఆశించిన స్థాయిలో విజయం సాధించకపోయినా, ఆయన దర్శకత్వ శైలి మాత్రం ప్రేక్షకులను ఆకట్టుకుంది.
అతని ప్రతిభను గమనించిన రవితేజ మళ్లీ మరో అవకాశం ఇవ్వడంతో, ఆ దర్శకుడు భారీ విజయాన్ని అందుకున్నాడు. ఆ తర్వాత పవర్ స్టార్ పవన్ కళ్యాణ్తో చేసిన సినిమా ఇండస్ట్రీలో భారీ హిట్గా నిలిచింది. ఆ చిత్రం ఆయన కెరీర్ను మరో స్థాయికి తీసుకెళ్లింది.
తర్వాత కొన్ని సినిమాలు ఆశించిన ఫలితాలు ఇవ్వకపోయినా, ఆయన క్రేజ్ మాత్రం తగ్గలేదు. ప్రస్తుతం మరోసారి పవర్ స్టార్తో కలిసి కొత్త సినిమా తీస్తూ ప్రేక్షకుల ముందుకు రావడానికి సిద్ధమవుతున్నాడు. సోషల్ మీడియాలో వైరల్ అవుతున్న ఆ త్రోబ్యాక్ ఫొటోలో కనిపిస్తున్న వ్యక్తి మరెవరో కాదు… ప్రముఖ దర్శకుడు హరీశ్ శంకర్. ప్రస్తుతం ఆయన తీస్తున్న ‘ఉస్తాద్ భగత్ సింగ్’ సినిమాపై అభిమానుల్లో భారీ అంచనాలు ఉన్నాయి
