ఆరోగ్యానికి బలమైన పునాది నిద్రే. కానీ నేటి వేగవంతమైన జీవనశైలిలో చాలామందికి నిద్ర మధ్యలో తెగిపోవడం, రాత్రి పదేపదే మేల్కొనడం సాధారణంగా మారింది. దీన్ని చిన్న సమస్యగా భావించడం ప్రమాదకరమని వైద్య నిపుణులు హెచ్చరిస్తున్నారు. తాజా వైద్య అధ్యయనాల ప్రకారం నిద్ర సరిగా లేకపోతే గుండె ఆరోగ్యంపై దీర్ఘకాలిక ప్రతికూల ప్రభావాలు పడే అవకాశం ఉంది.
సాధారణంగా ఒక పెద్దమనిషికి రోజుకు కనీసం 7 నుంచి 8 గంటల నాణ్యమైన నిద్ర అవసరం. ఈ సమయం పూర్తిగా నిద్రలో గడవకపోతే శరీరం తనను తాను మరమ్మతు చేసుకునే ప్రక్రియ సరిగా జరగదు. ఫలితంగా రక్తపోటు పెరగడం, గుండెపై ఒత్తిడి పెరగడం వంటి సమస్యలు తలెత్తుతాయని పరిశోధకులు చెబుతున్నారు. నిద్ర లోపం మెదడు పనితీరుపై కూడా ప్రభావం చూపుతుందని అధ్యయనాలు సూచిస్తున్నాయి.
మంచి నిద్రలో గుండెకు సహజంగా విశ్రాంతి లభిస్తుంది. ఈ సమయంలో రక్తపోటు స్థిరంగా ఉంటుంది. కానీ నిద్ర మధ్యలో తరచూ అంతరాయం కలిగితే గుండె నిరంతరం అలర్ట్ మోడ్లోనే ఉంటుంది. దీని వల్ల శరీరంలో వాపు పెరగడం, గుండెపోటు ప్రమాదం అధికమవడం వంటి సమస్యలు ఎదురవుతాయి. రాత్రికి రెండు నుంచి మూడు సార్లు మేల్కొనే వారిలో గుండె జబ్బుల ముప్పు గణనీయంగా పెరుగుతుందని నిపుణులు చెబుతున్నారు.
నిద్ర చెదరడానికి ప్రధాన కారణాల్లో మానసిక ఒత్తిడి ఒకటి. నిద్రపోయినా మెదడు పూర్తిగా విశ్రాంతి పొందకపోతే ఆలోచనలు కొనసాగుతూనే ఉంటాయి. పని ఒత్తిడి, ఆందోళన, భవిష్యత్తు గురించిన భయాలు నిద్రను దూరం చేస్తాయి. ఈ మానసిక ఒత్తిడి గుండె ఆరోగ్యానికీ ప్రమాదమేనని వైద్యులు స్పష్టం చేస్తున్నారు.
ఈ సమస్య కొన్ని వర్గాల్లో ఎక్కువగా కనిపిస్తోంది. స్లీప్ అప్నియాతో బాధపడేవారు, అధిక ఒత్తిడిలో ఉండే ఉద్యోగులు, రాత్రివేళ ఎక్కువసేపు మొబైల్ లేదా టీవీ స్క్రీన్లకు అతుక్కుపోయేవారు నిద్ర భంగానికి ఎక్కువగా గురవుతున్నారు.
నిద్ర సమస్యల్ని తగ్గించుకోవాలంటే జీవనశైలిలో కొన్ని మార్పులు అవసరం. పడుకునే ముందు మొబైల్, టీవీలను పక్కన పెట్టాలి. ప్రతిరోజూ ఒకే సమయానికి పడుకుని మేల్కొనే అలవాటు చేసుకోవాలి. రాత్రిపూట టీ, కాఫీ వంటి ఉత్తేజక పానీయాలు మానేయాలి. మానసిక ఒత్తిడిని తగ్గించేందుకు యోగా, ధ్యానం ఉపకరిస్తాయి.
రాత్రిపూట నిద్ర పదేపదే చెదిరిపోతుంటే దాన్ని నిర్లక్ష్యం చేయకుండా వైద్యుడిని సంప్రదించడం మంచిది. సరైన నిద్రే ఆరోగ్యకరమైన హృదయానికి కీలకం అన్న విషయాన్ని మర్చిపోవద్దు.
