Doctor Harsha friend Vijay : 32 ఏళ్లకే క్యాన్సర్ తో పోరాడి మరణించిన డాక్టర్ హర్షవర్ధన్ తాను మరణించినా తన మరణాన్ని స్వీకరించిన విధానంతోనే అందరినీ కన్నీరు పెట్టిస్తున్నారు. క్యాన్సర్ తో పోరాడుతూ తాను బాధపడుతున్నా తనవారికి మనో ధైర్యాన్ని నింపి మరణించారు. తన అంత్యక్రియలకు తానే అందరినీ పిలిచి మరీ మరణించాడు. జీవితంలో మరణం అందరికీ వస్తుంది కానీ దాన్ని ఎలా స్వీకరిస్తున్నామన్న దానికి కొత్త భాష్యం చెప్పారు హర్షవర్ధన్. బ్రతికినన్ని రోజులు తన వాళ్లతో మాట్లాడుతూ ఓల్డ్ ఏజ్ హోమ్ లోని ఎంతో మందికి సహాయం చేస్తూ తనవల్ల ఎవరూ ఇబ్బంది పడకుండా జాగ్రత్త పడుతూ ఈ ప్రపంచాన్ని వదిలి వెళ్ళిపోయిన హర్షవర్ధన్ గారిని తలచుకుంటూ ఆయన స్నేహితులు ఎమోషనల్ అవుతున్నానరు. ఆయన గురించి పలు జ్ఞాపకాలను ఇంటర్వ్యూలలో పంచుకున్నారు.
క్యాన్సర్ అని చెప్పినపుడు బాగా ఏడ్చాడు…
హర్షవర్ధన్ పెళ్ళైన తరువాత ఆస్ట్రేలియా వెళ్ళగానే తనకు క్యాన్సర్ సోకినట్లు తెలిసింది. ఇక తన స్నేహితుడు విజయ కృష్ణ కు ఈ విషయం చెప్పి బాగా ఏడ్చాడట హర్ష. చదువుకునే సమయం నుండి స్నేహితులుగా ఉన్న విజయ్ అలాగే హర్ష ఇద్దరూ అన్నీ విషయాలనూ మాట్లాడుకునేవారు. ఇక క్యాన్సర్ సోకిన తరువాత హైదరాబాద్ వచ్చెయ్ ఇక్కడ మంచి హాస్పిటల్స్ ఉన్నాయి ఇక్కడే చికిత్స తీసుకోమని చెప్పినా తాను చికిత్స తీసుకునే సమయంలో పడే బాధ చూసి తల్లిదండ్రులు తట్టుకోలేరని అందుకే ఇక్కడే ఉంటాను అని ఆస్ట్రేలియాలో ఉండిపోయాడు అంటూ హర్ష స్నేహితుడు విజయ్ చెప్పారు. తనను చూడాలని ఉందని ఇండియా వచ్చినపుడు కలుద్దామని చెప్పినా వద్దు నన్ను ఇలా చూస్తే మీరు బాధపడతారు, నాకు అలా మీరందరూ నన్ను జాలిగా చూడటం ఇష్టం లేదు అని తాను మమల్ని కలవలేదు అంటూ విజయ్ తెలిపారు. అయితే చనిపోయే కొద్ది రోజుల ముందు కాల్ చేసి ఇక ఎక్కువ రోజులు బ్రతకను కేవలం మూడు వారాలని డాక్టర్స్ చెప్పారు అని చెప్పి రోజూ ఫోన్ లేదా మెసేజ్ చేస్తుండు, ఏ రోజైతే రిప్లై రాదో ఆ రోజు నేను లేనట్లు అంటూ చెప్పినపడు చాలా ఏడుపొచ్చింది. ఇక తన పేరెంట్స్ నంబర్స్ నాకు పంపించి ఒకవేళ నా నుండి మెసేజ్ కి రిప్లై ఇవ్వకపోతే నాన్ కు కాల్ చెయ్ ఆయన విషయం చెబుతారు, నా అంత్యక్రియలకు రా అంటూ పిలిచాడు. ఆ రోజు చాలా బాధపడ్డాము.
మార్చి 22న మాట్లాడాను ఏమీ కాదు అని చెప్పినా నాకు తెలుస్తోంది నేను ఎక్కువ రోజులు బ్రతకను ఇంక డేస్ ఉన్నాయి అంటూ చెప్పాడు. తమ్ముడి పెళ్ళికి మే లో కలుద్దామని తానే చెప్పి ఇలా మరణిస్తాడని అనుకోలేదు. తనని తన పెళ్ళిలోనే చివరగా చూడటం అంటూ చెప్పారు విజయ్. తనకు సేవాభావం చాలా ఎక్కువ, ముందు నుండి అలాగే ఉండేవాడు, అందుకే ఆ దేవుడే కాపాడతాడు అనుకున్నాం ఆ మంచే కాపాడుతుంది అనుకున్నాం కానీ ఇంత తొందరగా తీసుకెళ్తాడని అనుకోలేదు. హర్ష కి తన తల్లి అంటే చాలా ఇష్టం అంత్యక్రియలపుడు తన తల్లిని మేము ఫేస్ చేయలేకపోయాం. అంటీ బాధను ఎవరూ తీర్చలేము అంటూ హర్ష స్నేహితుడు విజయ్ ఎమోషనల్ అయ్యారు.
