కోడిగుడ్డు నీటిపై తేలుతుందా..? అయితే వెంటనే జాగ్రత్త పడాల్సిందే!

కోడిగుడ్డు ఆరోగ్యానికి ఎంతో మేలు చేసే ఆహారంగా గుర్తింపు పొందింది. ప్రోటీన్లు, విటమిన్లు, ఖనిజాలు సమృద్ధిగా ఉండటంతో చిన్నపిల్లల నుంచి పెద్దల వరకు చాలామంది ప్రతిరోజూ గుడ్లను ఆహారంలో భాగంగా తీసుకుంటుంటారు. అయితే తాజాగా కనిపించే ప్రతి గుడ్డు తినడానికి సురక్షితం అనుకోవడం పొరపాటేనని ఆరోగ్య నిపుణులు హెచ్చరిస్తున్నారు. సరైన విధంగా నిల్వ చేయకపోతే గుడ్లు త్వరగా పాడైపోయే అవకాశం ఉంటుందని చెబుతున్నారు.

పాడైన గుడ్లలో బ్యాక్టీరియా పెరిగే ప్రమాదం ఎక్కువగా ఉంటుంది. ముఖ్యంగా సాల్మొనెల్లా వంటి హానికర సూక్ష్మక్రిములు చేరితే ఫుడ్ పాయిజనింగ్ సమస్యలు తలెత్తే అవకాశం ఉందని వైద్యులు సూచిస్తున్నారు. ఇలాంటి గుడ్లు తింటే కడుపునొప్పి, వాంతులు, విరోచనాలు, జీర్ణ సమస్యలు వచ్చే ప్రమాదం ఉంటుంది. అందుకే గుడ్డును వండే ముందు అది తాజాగా ఉందో లేదో చెక్ చేయడం చాలా అవసరం అంటున్నారు.

గుడ్డు మంచిదో కాదో తెలుసుకోవడానికి ఇంట్లోనే సులభంగా చేసే కొన్ని టెస్టులు ఉన్నాయి. అందులో ముఖ్యమైనది ఫ్లోట్ టెస్ట్. ఒక గిన్నెలో చల్లటి నీరు తీసుకుని అందులో గుడ్డును వేయాలి. గుడ్డు పూర్తిగా అడుగున మునిగి అడ్డంగా పడుకుంటే అది తాజా గుడ్డు అని అర్థం. ఒకవేళ గుడ్డు నిలువుగా ఉండినా ఇంకా వాడుకోవచ్చు. కానీ నీటిపై తేలితే అది పాడైపోయినట్టే అని నిపుణులు చెబుతున్నారు.

గుడ్డు పాతబడే కొద్దీ దాని లోపల గాలి భాగం పెరుగుతుంది. అందుకే అది నీటిపై తేలడం ప్రారంభమవుతుంది. అలాంటి గుడ్లను తినకుండా వెంటనే పారేయడం మంచిదని సూచిస్తున్నారు. అలాగే గుడ్డును పగలగొట్టినప్పుడు వచ్చే వాసన కూడా చాలా ముఖ్యమని చెబుతున్నారు. మంచి గుడ్డుకు ప్రత్యేకమైన వాసన ఉండదు. కానీ చెడిపోయిన గుడ్డులో ఘాటైన దుర్వాసన వస్తే దాన్ని అస్సలు ఉపయోగించకూడదని హెచ్చరిస్తున్నారు.

ఇంకో సులభమైన పద్ధతి మొబైల్ ఫ్లాష్‌లైట్ టెస్ట్. చీకటి గదిలో మొబైల్ టార్చ్ వెలుతురును గుడ్డు వెనుక నుంచి చూపిస్తే లోపలి భాగం స్పష్టంగా కనిపిస్తుంది. గుడ్డు లోపల సాధారణంగా లైట్ కలర్‌లో కనిపిస్తే అది తాజాగా ఉందని భావించవచ్చు. నల్లటి మచ్చలు లేదా అసాధారణ ఆకారాలు కనిపిస్తే ఆ గుడ్డును వాడకపోవడం మంచిదని నిపుణులు చెబుతున్నారు.

ఆహారంలో గుడ్లు ఎంత ముఖ్యమో, వాటి నాణ్యత కూడా అంతే ముఖ్యమని ఆరోగ్య నిపుణులు సూచిస్తున్నారు. చిన్న జాగ్రత్తలు తీసుకుంటే పాడైన గుడ్ల వల్ల వచ్చే అనారోగ్య సమస్యలను సులభంగా దూరం పెట్టవచ్చని చెబుతున్నారు.