రెగ్యులర్ కమర్షియల్ ఎలిమెంట్స్ తో వచ్చిన సినిమాలను చూసి, చూసి విసిగిపోయినా తెలుగు ప్రేక్షకులు భిన్నమైన కథాంశంతో వచ్చిన ఏ సినిమా అయినా చూడడానికి సిద్ధంగా ఉన్న పరిస్థితుల్లో ఫ్యాక్షన్ సినిమాలు రావడంతో అవి కొత్తగా అనిపించి వాటిని తెలుగు ప్రేక్షకులు చూడడం ప్రారంభించారు.
అలా ఫ్యాక్షన్ నేపద్యంలో వచ్చిన ప్రేమించుకుందాం రా, సీతారామరాజు, సమరసింహా రెడ్డి, అంతపురం, ఇంద్ర, ఆది, నరసింహ నాయుడు, చెన్నకేశవరెడ్డి, సీమ సింహం, దమ్ము, మిర్చి, అరవింద సమేత వీర రాఘవ లాంటి సినిమాలన్నీ దాదాపు బాక్స్ ఆఫీసు వద్ద రికార్డులు సృష్టించాయి. నిర్మాతలకు ఈ సినిమాలతో కనకవర్షం కురిసింది. టాప్ స్టార్స్ రాయలసీమ ఫ్యాక్షన్ నేపథ్యంలో ఒక్క సినిమా అయినా చేయాలని కథా రచయితలను కోరే పరిస్థితి కూడా వచ్చింది. అలా తమ అభిమాన హీరో నటించిన ఫ్యాక్షన్ నేపధ్య సినిమాలకి ప్రేక్షకులు బ్రహ్మరథం పట్టారు.
ఈ బ్లాక్ బస్టర్ సినిమాల కంటే ముందే తెలుగులో1990 ప్రథమార్థంలో రాయలసీమ ప్రాంత నేపథ్యంలో ఒక సినిమా వచ్చింది. 1991లో ఆర్.సి.క్రియేషన్స్ పతాకంపై రాధాకృష్ణ చలపతిరావు నిర్మాతలుగా కడప రెడ్డెమ్మ సినిమా వచ్చింది. రగులుతున్న రాయలసీమ జీవన బతుకుల్ని కళ్ళకు కట్టినట్టుగా ఈ సినిమాను దర్శకుడు తమ్మారెడ్డి భరద్వాజ చూపించడం జరిగింది. మోహన్ బాబు, శారద, రంజిత గిరిబాబు, నర్ర, అన్నపూర్ణ, చలపతిరావు మొదలగువారు ఈ సినిమాలో ప్రధాన తారాగణం. ఇప్పటి ఫ్యాషన్ నేపధ్య సినిమాలకి మొదటగా కడప రెడ్డెమ్మ సినిమా పరుచూరి బ్రదర్స్ కలం నుంచి జాలువారిన చిత్రంగా పేర్కొనవచ్చు.
