అత్తమామల పోషణ విషయంలో కోడలిపై ఎంతవరకు బాధ్యత ఉంటుంది అనే ప్రశ్నపై అలహాబాద్ హైకోర్టు కీలక తీర్పు వెలువరించింది. కుటుంబ వ్యవస్థలో కోడలు పెద్దల సంరక్షణలో భాగస్వామ్యం కావాలనే సామాజిక భావన ఉన్నప్పటికీ, చట్టపరంగా ఆమెపై అటువంటి బలవంతపు బాధ్యత లేదని న్యాయస్థానం స్పష్టం చేసింది.
ఈ కేసు ఉత్తరప్రదేశ్‌కు చెందిన ఒక కుటుంబంతో సంబంధం కలిగి ఉంది. పోలీసు విభాగంలో పనిచేసిన వ్యక్తి కొన్ని సంవత్సరాల క్రితం ప్రమాదంలో మరణించాడు. అతని మరణంతో కుటుంబం ఆర్థికంగా ఇబ్బందులు ఎదుర్కొంది. తల్లిదండ్రులు తమ కుమారుడిపై ఆధారపడి జీవించేవారని, ఇప్పుడు తమకు ఆదారం లేకపోయిందని పేర్కొన్నారు.
కుమారుడి మరణానంతరం వచ్చిన ఆర్థిక ప్రయోజనాలు కోడలికి అందాయని, అందువల్ల తమ పోషణ బాధ్యత కూడా ఆమె తీసుకోవాలని కోరుతూ వృద్ధ దంపతులు మొదట ఫ్యామిలీ కోర్టును ఆశ్రయించారు. అయితే, ఫ్యామిలీ కోర్టు వారి అభ్యర్థనను తిరస్కరించింది. చట్టం ప్రకారం కోడలిపై అత్తమామల భరణం బాధ్యత లేదని స్పష్టం చేసింది.
ఈ నిర్ణయాన్ని సవాలు చేస్తూ వారు హైకోర్టును ఆశ్రయించారు. విచారణ సందర్భంగా న్యాయస్థానం సంబంధిత చట్టాలపై సమగ్రంగా పరిశీలన జరిపింది. ముఖ్యంగా భరణం అంశానికి సంబంధించిన చట్టంలోని నిబంధనలను పరిశీలించిన కోర్టు, భర్త లేదా కుమారుడు తన భార్య, పిల్లలు, తల్లిదండ్రులకు మాత్రమే భరణం చెల్లించాల్సిన బాధ్యత ఉందని పేర్కొంది.
శాసనంలో అత్తమామలను ఈ పరిధిలో చేర్చలేదని కోర్టు గమనించింది. అందువల్ల కోడలిపై అత్తమామల పోషణ బాధ్యతను మోపడం చట్టపరంగా సరైంది కాదని తేల్చిచెప్పింది. ఈ మేరకు దిగువ కోర్టు ఇచ్చిన తీర్పును హైకోర్టు సమర్థించింది.
న్యాయ నిపుణుల అభిప్రాయం ప్రకారం, ఈ తీర్పు కుటుంబ వ్యవస్థలో సామాజిక బాధ్యతలు, చట్టబద్ధ కట్టుబాట్ల మధ్య ఉన్న తేడాను స్పష్టంగా చూపిస్తుంది. కోడలు కుటుంబ సభ్యురాలిగా పెద్దలను గౌరవించడం, సహాయం చేయడం వేరు.. కానీ అది చట్టపరంగా తప్పనిసరి కాదని ఈ తీర్పు ద్వారా మరోసారి స్పష్టమైంది.
మొత్తానికి, అత్తమామల పోషణపై కోడలిపై చట్టబద్ధ బాధ్యత లేదని హైకోర్టు ఇచ్చిన ఈ తీర్పు భవిష్యత్ కేసులకు మార్గదర్శకంగా నిలిచే అవకాశం ఉంది.
