మామిడి పండ్ల సీజన్ వచ్చిందంటే మార్కెట్లో ఎన్నో రకాల వెరైటీలు కనిపిస్తాయి. కానీ ప్రస్తుతం అందరి దృష్టిని ఆకర్షిస్తున్నది మాత్రం ‘బ్లాక్ స్టోన్’ మామిడి. సాధారణ మామిడి పండ్లతో పోలిస్తే దీని ధరే కాదు, రూపం కూడా పూర్తిగా భిన్నంగా ఉండటంతో ఈ ప్రత్యేక జాతి గురించి చర్చ మొదలైంది. కిలో ధర వేల రూపాయలు ఉన్నప్పటికీ ఈ మామిడికి డిమాండ్ మాత్రం తగ్గడం లేదు.
మధ్యప్రదేశ్లోని భోపాల్ నగరంలో ఉన్న జవహర్ ఉద్యాన్లో ఈ అరుదైన మామిడి పండ్లు సాగు చేస్తున్నారు. ఈ తోటను భారత్ హెవీ ఎలక్ట్రికల్స్ లిమిటెడ్ (BHEL) నిర్వహిస్తోంది. ఇక్కడ 150కిపైగా రకాల మామిడి చెట్లు ఉండగా, వాటిలో బ్లాక్ స్టోన్ ప్రత్యేక ఆకర్షణగా నిలుస్తోంది.
ఈ మామిడి సాధారణ పచ్చ రంగులో కాకుండా నలుపు, ఊదా రంగుల మిశ్రమంలో కనిపిస్తుంది. విదేశీ జాతికి చెందిన ఈ పండ్లు ప్రత్యేకమైన వాసన, రుచితో గుర్తింపు పొందాయి. ముఖ్యంగా వీటిలో పీచు తక్కువగా ఉండటం, గుజ్జు ఎక్కువగా ఉండటం వల్ల ప్రీమియం ఫ్రూట్గా మార్కెట్లో మంచి డిమాండ్ ఏర్పడింది.
ప్రస్తుతం ఈ బ్లాక్ స్టోన్ మామిడి కిలో ధర రూ.4 వేల నుంచి రూ.6 వేల వరకు పలుకుతోంది. అధిక ధర ఉన్నప్పటికీ అరుదైన రకం కావడంతో కొనుగోలుదారులు ఆసక్తి చూపుతున్నారు. పండ్ల ప్రదర్శనలకు వచ్చే సందర్శకులు కూడా ఈ మామిడిని ప్రత్యేకంగా చూసేందుకు ఆసక్తి కనబరుస్తున్నారు.
జవహర్ ఉద్యాన్లో బ్లాక్ స్టోన్తో పాటు సాఫ్రాన్, నూర్జహాన్, హాపుస్, దషెహ్రి వంటి పలు అరుదైన మామిడి జాతులు కూడా సాగు చేస్తున్నారు. దీంతో ఈ ఉద్యాన్ పండ్ల ప్రేమికులకు ప్రత్యేక ఆకర్షణగా మారింది.
