కేరళ రాజధాని తిరువనంతపురం నగర పరిసర ప్రాంతంలో సోమవారం తెల్లవారుజామున చోటుచేసుకున్న అగ్ని ప్రమాదం స్థానికులను ఉలిక్కిపడేలా చేసింది. నగరానికి సమీపంలోని పల్లిప్పురం ప్రాంతంలో ఉన్న ఒక ప్రైవేట్ పాఠశాల ఆవరణలో నిలిపి ఉంచిన బస్సులు ఒక్కసారిగా మంటల్లో చిక్కుకోవడంతో ఉద్రిక్త పరిస్థితులు నెలకొన్నాయి.
సమాచారం ప్రకారం, ఉదయం సుమారు 2.30 గంటల సమయంలో పాఠశాల మైదానంలో పార్క్ చేసి ఉన్న బస్సుల నుంచి పెద్ద శబ్దాలు వినిపించాయి. ఒక్కసారిగా మంటలు ఎగిసిపడటంతో సమీపంలోని నివాసితులు భయంతో బయటకు పరుగులు తీశారు. పేలుళ్ల శబ్ధం కారణంగా చాలామంది నిద్రలేచి పరిస్థితిని అంచనా వేసేందుకు బయటకు వచ్చారు.
ఘటన గురించి తెలుసుకున్న వెంటనే స్థానికులు పోలీసులకు, అగ్నిమాపక శాఖకు సమాచారం అందించారు. స్పందించిన అగ్నిమాపక సిబ్బంది తక్షణమే ఘటనాస్థలికి చేరుకుని మంటలను అదుపులోకి తీసుకొచ్చారు. అయితే అప్పటికే మూడు స్కూల్ బస్సులు పూర్తిగా దగ్ధమయ్యాయి. మరో వాహనం తీవ్రంగా దెబ్బతిన్నట్లు అధికారులు వెల్లడించారు.
కజకూట్టం మరియు చాకై అగ్నిమాపక కేంద్రాల నుంచి చేరుకున్న సిబ్బంది సుమారు రెండు గంటల పాటు శ్రమించి మంటలను పూర్తిగా ఆర్పేశారు. అదృష్టవశాత్తూ ప్రమాద సమయంలో బస్సుల్లో ఎవరూ లేకపోవడంతో ప్రాణనష్టం తప్పింది. ఈ విషయాన్ని అగ్నిమాపక అధికారులు ధృవీకరించారు.
అయితే ప్రమాదం జరిగిన తీరు పలు అనుమానాలకు దారి తీస్తోంది. సాధారణంగా బస్సులకు ఎదురుగా పార్క్ చేసి ఉండే ఒక ట్రావెలర్ వాహనం, ఘటన సమయంలో బస్సుల వైపుకు దగ్గరగా ఉండటం గమనార్హం. మంటలు ఆ వాహనం వద్ద నుంచి ప్రారంభమై ఉండవచ్చని పాఠశాల సిబ్బంది ప్రాథమికంగా అనుమానిస్తున్నారు. ఎవరో కావాలనే వాహనాన్ని కదిలించి ఉండొచ్చన్న అనుమానాలు వ్యక్తమవుతున్నాయి.
ఒకేసారి మూడు బస్సులు పూర్తిగా కాలిపోవడం పాఠశాల యాజమాన్యానికి పెద్ద ఆర్థిక నష్టాన్ని మిగిల్చింది. వాహనాల విలువ కోట్ల రూపాయలు ఉండవచ్చని అంచనా. అగ్ని ప్రమాదానికి నిజమైన కారణం ఏమిటన్న దానిపై పోలీసులు దర్యాప్తు ప్రారంభించారు.
ఇంజిన్ వైరింగ్లో లోపం వల్ల షార్ట్ సర్క్యూట్ జరిగిందా? లేక దురుద్దేశపూర్వకంగా నిప్పుపెట్టారా? అన్న కోణాల్లో విచారణ కొనసాగుతోంది. పాఠశాల ప్రాంగణంలో ఉన్న సీసీటీవీ కెమెరాల ఫుటేజీని అధికారులు సేకరించారు. వాటి ఆధారంగా పూర్తి వివరాలు వెలుగులోకి రానున్నాయి.
ఈ ఘటనతో ప్రాంతంలో భద్రతా చర్యలపై చర్చ మొదలైంది. విద్యాసంస్థల్లో వాహనాల పార్కింగ్ విధానం, రాత్రి పహారా వంటి అంశాలపై మరింత జాగ్రత్త అవసరమని స్థానికులు అభిప్రాయపడుతున్నారు.
ప్రస్తుతం పరిస్థితి అదుపులోనే ఉన్నప్పటికీ, అర్ధరాత్రి జరిగిన ఈ ఘటన నగరంలో కలకలం రేపింది. పూర్తి దర్యాప్తు అనంతరం మాత్రమే అసలు కారణం వెల్లడయ్యే అవకాశం ఉంది.
