ప్రముఖ తెలుగు యూట్యూబర్, రివ్యూయర్ పూలచొక్కా నవీన్ ప్రస్తుతం పెద్ద వివాదంలో చిక్కుకున్నారు. ‘వర్జిన్ బాయ్స్’ సినిమా నిర్మాత రాజా దారపునేని చేసిన ఫిర్యాదు మేరకు ఫిల్మ్ నగర్ పోలీసులు ఆయనను అదుపులోకి తీసుకుని విచారించారు. సినిమాల విజయాలు ఈ మధ్యకాలంలో మౌత్ టాక్ ఆధారంగానే నిర్ణయించబడుతున్న తరుణంలో యూట్యూబ్ రివ్యూల ప్రభావం పెరిగిపోయింది. ముఖ్యంగా మొదటి షో అయిపోయిన వెంటనే యూట్యూబ్ చానళ్లపై రివ్యూలు ప్రత్యక్షమవుతూ, ప్రేక్షకుల అభిప్రాయాలను మారుస్తున్నాయి.
ఈ క్రమంలో ‘పూలచొక్కా’ యూట్యూబ్ ఛానెల్ నడిపిస్తున్న నవీన్ ఇటీవల విడుదలైన చిన్న చిత్రం ‘వర్జిన్ బాయ్స్’ పై తీవ్ర నెగటివ్ రివ్యూ ఇచ్చారు. “ఇది కథ లేకుండా తీసిన సినిమా… చూస్తే రిలాక్స్ కాదు, ఫుల్ బోర్” అంటూ సెటైర్లు వేసిన ఆయన, టమోటా రేటింగ్లో సినిమాకు “సగం టమోటా” ఇచ్చారు. ఈ రివ్యూ వల్ల సినిమా పట్ల ప్రజల్లో తక్కువ అభిరుచి కలగడంతో, థియేటర్లకు రావడం తగ్గిపోయిందని నిర్మాత రాజా దారపునేని అభిప్రాయపడ్డారు.
ఈ నేపథ్యంలోని అసలు సమస్య ఏమిటంటే.. నవీన్ తమ సినిమాకు పాజిటివ్ రివ్యూ ఇవ్వడానికి రూ. 40 వేలు డిమాండ్ చేశాడని, తిరస్కరించగానే నెగటివ్ రివ్యూ ఇచ్చాడని నిర్మాత ఆరోపించారు. దీన్ని తీవ్రంగా తీసుకున్న రాజా దారపునేని, ఈ విషయం పై పోలీసులకు ఫిర్యాదు చేశారు. ఫిర్యాదు ఆధారంగా ఫిల్మ్ నగర్ పోలీస్ స్టేషన్లో కేసు నమోదు కాగా, నవీన్ను విచారణకు పిలిపించి కొన్ని గంటల పాటు ప్రశ్నించిన తర్వాత వదిలినట్టు సమాచారం.
ఈ ఘటనపై సోషల్ మీడియాలో భారీ చర్చ జరుగుతోంది. యూట్యూబ్ రివ్యూయర్ల బాధ్యత ఎంతవరకు ఉండాలి? విమర్శలు నిజంగా సినిమా చూసి వస్తున్నాయా లేక వెనుక ఉన్న లాభనష్టాల పర్యవసానమా? అన్న ప్రశ్నలు మళ్లీ తెరపైకి వచ్చాయి. ముఖ్యంగా చిన్న సినిమాల విజయంలో ఈ రకమైన ప్రభావాలు ఎంతవరకు న్యాయమైనవి అన్నది పరిశ్రమలో పెద్ద చర్చగా మారింది.
