“బాహుబలి” తెలుగు చలన చిత్ర స్టామినా ఏంటో ప్రపంచానికి చాటి చెప్పిన సినిమా.. దర్శకధీరుడు రాజమౌళి తెరకెక్కించిన అద్భుత దృశ్యకావ్యం బాహుబలి. హీరో ప్రభాస్ ను జాతీయ నటుడిగా తీర్చిదిద్దిన చిత్రం. రెండు భాగాలుగా వచ్చిన ఈ సినిమా ఈరోజుకు రెండో భాగం (బాహుబలి 2) వచ్చి సరిగ్గా మూడు సంవత్సరాలు పూర్తయింది. ఈ సందర్భంగా తన అనుభవాలను, జ్ఞాపకాలను పంచుకున్నాడు ప్రభాస్. తన జీవితంలో అతిపెద్ద సినిమా బాహుబలి అని, ఎప్పటికి గుర్తుండిపోయే జ్ఞాపకం అని ప్రభాస్ తెలిపారు.
“దేశవ్యాప్తంగా బాహుబలి కేవలం సినిమానే కాదు… నా జీవితంలో అతిపెద్ద సినిమా ఇది.. నాకు గుర్తుండిపోయే అతిపెద్ద జ్ఞాపకాన్ని ఇచ్చిన రాజమౌళి, టీమ్, నా అభిమానులకు నేను ఎప్పుడూ రుణపడి ఉంటాను. ఈరోజుతో బాహుబలి 2 ప్రేక్షకుల ముందు వచ్చి మూడు సంవత్సరాలు పూర్తయింది. ఆ సినిమాలో నటించడం నా అదృష్టంగా భావిస్తున్నాను.. మీ అందరి ప్రేమకు కృతజ్ఞుడిని” అంటూ ట్వీట్ చేసారు.
