Pragathi : తెలుగులో అమ్మ పాత్రలలో ఎక్కువగా మెరిసి ఎన్నో సినిమాల్లో క్యారెక్టర్ ఆర్టిస్ట్ గా చేసిన నటి ప్రగతి అందరికీ తెలుసు, ఇదంతా కరోనా ముందు అనాలేమో. ఇప్పుడు మాత్రం అమ్మ పాత్రలతో కాదు ఇంస్టాగ్రామ్ రీల్స్ తో బాగా పాపులర్. కూతురుతో కలిసి డాన్సులు, ఇక తన వర్క్ అవుట్ వీడియోలతో తాను ఇప్పటి హీరోయిన్లకు ఏమాత్రం తీసిపోను అన్నట్లుగా దూసుకెళతోంది. ఇక ప్రగతి ఆంటీకి ఇంస్టాగ్రామ్ లో మంచి ఫాలోయింగ్ కూడా ఉంది. అయితే ప్రగతి మొదట హీరోయిన్ అవ్వాలని ఇండస్ట్రీకి వచ్చినా ఒక ఏడో ఎనిమిదో సినిమాల్లో మాత్రమే హీరోయిన్ గా చేసింది. ఆ తరువాత ఇక క్యారెక్టర్ ఆర్టిస్ట్ గా సెటిల్ అయింది.
హీరోహీరోయిన్లతో అలా పిలిపించుకోడానికి ఏడ్చేసాను…
సినిమాలో హీరోయిన్ గా చేస్తున్న సమయంలో రెయిన్ డాన్స్ సీన్ లో ఇబ్బందికరంగా ఉన్న బట్టలను నేను వేసుకోను అంటే ఒప్పుకోలేదు, దీంతో ఇక హీరోయిన్ గా సినిమాల్లో నటించలేనని సీరియల్స్ వైపు వెళ్ళిపోయాను అంటూ ప్రగతి ఇటీవల ఇంటర్వ్యూలో పంచుకున్నారు. తమిళం, తెలుగులో పలు సీరియల్స్ లో నటించిన ప్రగతి ఆ తరువాత మళ్ళీ మహేష్ బాబు ‘బాబీ’ సినిమాతో క్యారెక్టర్ ఆర్టిస్ట్ గా రీ ఎంట్రీ ఇచ్చి సినిమాల్లో ఇక తల్లి పాత్రలతో కంటిన్యూ అయింది. అయితే చిన్న వయసులోనే తల్లి పాత్రల్లో నటించడం వల్ల బాగా ఏడుపొచ్చేది అంటూ చెప్పారు.
చంద్రమోహన్ గారి కుటుంబంతో మంచి అనుబంధం ఉండేది, ఆయన భార్యను ఆంటీ అని పిలిచేదాన్ని కానీ ఆయన పక్కన భార్యగా సినిమాల్లో నటించాను. నా వయసు హీరోయిన్లు నన్ను అమ్మ అంటుంటే బాధేసేది. ఇక షూటింగ్ సెట్స్ కి స్టైల్ జడలు వేసుకుని వస్తే తల్లి పాత్రలు చేసే ఆమె ఇలాంటి జడలు అవసరమా అంటూ సూటిపోటి మాటలను అనేవారు. ఆ టైములో మేకప్ రూమ్ లోకి వెళ్లి గట్టిగా ఏడ్చేదాన్ని అంటూ తన కెరీర్ లో పడిన బాధలను ప్రగతి ఇంటర్వ్యూలో పంచుకున్నారు.
