శ్రీదేవి.. ఎందరో అభిమానుల ఆరాధ్య దేవత శ్రీదేవి. సెలెబ్రేటిస్ నుంచి సాధారణ ఆడియన్స్ వరకు ఎందరో అభిమానులు ఆమె సొంతం. అందం, అభినయంలో ఆమె తరువాతే ఎవరైనా.. కేవలం ఆన్ స్క్రీన్ మీదే కాదు ఆఫ్ స్క్రీన్ పై కూడా ఆమె చాలా హుందాగా ప్రవర్తిస్తారని ఇప్పటికి చెబుతుంటారు ఆమెతో నటించిన తోటి నటీనటులు. తెలుగు, తమిళం, హిందీ ఇలా అన్ని భాషల ప్రేక్షకుల గుండెల్లో ఆమె తనకంటూ ఎప్పటికి చెరిగిపోని సుస్థిర స్థానాన్ని సంపాదించుకుంది.
ఎటువంటి పాత్రనైనా అవలీలగా చేయడం ఆమెకే చెల్లింది. తెలుగు తెరపై ఆమె ఎన్టీఆర్, ఏఎన్నార్ వంటి ఒకప్పటి స్టార్స్ నుంచి మొదలుకొని చిరంజీవి, నాగార్జున, వెంకటేష్ వంటి నిన్నటి తరం స్టార్స్ వరకు అందరి సరసన నటించి ప్రేక్షకులను అలరించింది శ్రీదేవి. అదే సమయంలో సూపర్ స్టార్ రజనీకాంత్ తో కూడా పలు చిత్రాల్లో నటించింది. ఇక అసలు విషయానికి వస్తే… ఒక సినిమాలో శ్రీదేవి రజనీకాంత్ కి తల్లిగా నటించిన విషయం ఎంత మందికి తెలుసు? ఇప్పటి తరానికి తెలియకపోవచ్చు కానీ అప్పటి తరానికి మాత్రం ఇది తెలిసిన విషయమే.
ప్రముఖ దర్శకుడు కె.బాలచందర్ దర్శకత్వంలో వచ్చిన “ముండ్రు ముడిచ్చు” అనే తమిళ చిత్రంలో రజనికాంత్ సవతి తల్లిగా నటించారు శ్రీదేవి. అప్పుడు ఆమె వయస్సు 13 ఏళ్ళు. ఈ కధలో తనను ప్రేమించిన వ్యక్తిని దూరం చేసినందుకు రజినీపై కోపంతో పగ తీర్చుకునేందుకు అతని తండ్రిని పెళ్లి చేసుకుని సవతి తల్లిగా మారుతుంది శ్రీదేవి. ఆ తరువాత రజని, శ్రీదేవిల జోడి హిట్ పెయిర్ గా పలు చిత్రాల్లో నటించిన విషయం తెలిసిందే.
