Srikanth Iyengar : వృత్తి పరంగా డాక్టర్ అయినా యాక్టర్ అవ్వాలన్న కోరికతో సినిమా ఇండస్ట్రీలోకి అడుగుపెట్టిన శ్రీకాంత్ అయ్యంగర్ కరోనావైరస్, బ్రోచేవరెవరురా, మజిలీ, డియర్ కామ్రేడ్, ప్రతిరోజు పండగే సినిమాతో మంచి గుర్తింపు అలాగే అవకాశాలు అందుకున్నారు. ఇక ముక్కుసూటిగా ఉండే శ్రీకాంత్ అయ్యంగర్ ఆ స్వభావం వల్ల చాలా మంది దూరంగా ఉంటారని, కానీ మళ్ళీ తానే వెళ్లి వారితో మాట్లాడి మళ్ళీ కలిసిపోవడం అలవాటని, సినిమా షూటింగ్ లేకపోతే చాలా ఇబ్బందిగా ఉంటుందని, అలవాటు పడిపోయి ఖాళీగా ఉండాలంటే కష్టంగా ఉంటుందంటూ చెప్పారు. పాత్ర ఏదైనా సరే సినిమాల్లో నటిస్తూ ఉన్నా అయ్యంగర్ తన సినిమా అనుభవాలను పంచుకున్నారు.
ఆ సినిమా కేవలం డబ్బు కోసం మాత్రమే చేశాను…
శివ నిర్వాణ దర్శకత్వంలో వచ్చిన ‘మజిలీ’ సినిమాలో చిన్న పాత్రలో కనిపించారు శ్రీకాంత్ అయ్యంగర్. అప్పటికే ‘డియర్ కామ్రేడ్’ వంటి సినిమాలో నటించిన ఆయనకు ఒక సీన్ ఉంది చేయమని అడిగారట. ఆదే సమయంలో కుటుంబంతో కలిసి గోవా వెళ్తున్న శ్రీకాంత్ గారు సరే ఒక సీన్ కదా చేస్తే ఒక ముప్పై, నలభై వేలు వస్తాయి అవి గోవా ఖర్చులకు పనికొస్తాయని అనుకుని వెళ్లి చేశారట.
అయితే నాలుగు నెలలు తరువాత ఆ సినిమాలో సీన్ చూసి డైరెక్టర్ మారుతీ గారు ‘ప్రతిరోజు పండగే’ సినిమాలో అవకాశం ఇచ్చాడట. మారుతీ లాంటి డైరెక్టర్ అవకాశం అంటే ఇంకేం కావాలి అనుకుని చేసేసాను అంటూ చెప్పారు. అలా పాత్ర ఏంటి ఎంత నిడివి అని ఆలోచించకుండా పారితోషకం, డేట్స్ మ్యాచ్ అయ్యాయా లేదా అని మాత్రమే చూసుకుంటా అంటూ చెప్పారు. తాజాగా ‘ఈ అమ్మాయి గురించి మీకు చెప్పాలి’ సినిమాలో హీరోయిన్ కృతి శెట్టికి తండ్రిగా నటించారు.
