డిసెంబర్ 9న మెగా బ్రదర్ నాగబాబు కూతురు నిహారిక డెస్టినేషన్ వెడ్డింగ్ ఉదయపూర్ లోని ఉదయ్ విలాస్ లో ఐదు రోజుల పాటు ఘనంగా నిర్వహించారు. డిసెంబర్ 9న నిహారిక చైతన్యల వివాహం కేవలం కుటుంబ సభ్యులు, సన్నిహితుల సమక్షంలో అంగరంగ వైభవంగా జరిగింది. ఈ పెళ్లికి సంబంధించిన ఫోటోలను, వీడియోలను మెగా కుటుంబ సభ్యులు ఎప్పటికప్పుడు సోషల్ మీడియాలో షేర్ చేస్తూ తమ అభిమానులతో పంచుకున్నారు.

మెగా బ్రదర్ నాగబాబు నిహారిక పెళ్లి వేడుక వీడియోలను యూట్యూబ్ ఛానల్ ద్వారా షేర్ చేశారు. తాజాగా నిహారిక సంగీత్ వీడియోను షేర్ చేశారు. ఇందులో మెగా హీరోలు, నిహారిక, చైతన్య, చేసిన డాన్సులు చూడవచ్చు. అంతేకాకుండా ఈ వీడియోలో  ‘నిశ్చయ్‌’ డెస్టినేషన్ వెడ్డింగ్ చేయడానికి గల కారణాలను కూడా నాగబాబు తమ అభిమానులతో పంచుకున్నారు.

‘నిశ్చయ్‌’ పెళ్లిని డెస్టినేషన్ వెడ్డింగ్ చేయడానికి ఎన్నో కారణాలు ఉన్నాయని తెలిపారు.కరోనా ఎక్కువగా వ్యాపిస్తున్న నేపథ్యంలో కేవలం కుటుంబ సభ్యుల సమక్షంలో మాత్రమే ఈ వేడుకను నిర్వహించాము. అంతేకాకుండా మెగాహీరో లైన బన్నీ, చరణ్ వివాహానికి వేలసంఖ్యలో అతిథులు రావడంతో వారి పెళ్లిని మేము ఎంజాయ్ చేయలేక పోయామని, అందుకోసమే నిహారిక వివాహాన్ని డెస్టినేషన్ రూపంలో ప్లాన్ చేసినట్టు ఆయన తెలిపారు.

ఈ వివాహానికి నిహారిక_చైతన్య ఇష్ట ప్రకారమే డెస్టినేషన్ వెడ్డింగ్ ప్లాన్ చేశామని నాగబాబు తెలిపారు. నిహారిక పెళ్లి ఏర్పాట్లను వరుణ్ తేజ్ దగ్గరుండి చేశారని ఆయన తెలిపారు. పెళ్లి తర్వాత నూతన దంపతులు పలు ఆలయాలను దర్శిస్తున్నారు.పెళ్లి అయిన వెంటనే అన్నవరం సత్యనారాయణ స్వామిని దర్శించుకుని ప్రత్యేక పూజల్లో పాల్గొన్నారు. ఈరోజు ఉదయం తిరుమలకు చేరుకుని వీఐపీ దర్శన సమయంలో స్వామివారిని దర్శించుకున్నారు. నిహారిక దంపతులతో పాటు చైతన్య తల్లిదండ్రులు, నిహారిక తల్లి పద్మజ తిరుమల ఆలయానికి చేరుకున్నారు.అందుకు సంబంధించిన ఫోటోలు ప్రస్తుతం సోషల్ మీడియాలో వైరల్ అయ్యాయి.