ఐపీఎల్ కొత్త సీజన్ సందడి మొదలయ్యే వేళ బెంగళూరు నగరంలో క్రికెట్ హడావుడి కాస్త ముందుగానే కనిపిస్తోంది. టీమిండియా స్టార్ బ్యాటర్ విరాట్ కోహ్లీ నగరానికి చేరుకోవడంతో అభిమానుల్లో ఉత్సాహం వెల్లివిరిసింది. ‘కింగ్’ రాకతో సోషల్ మీడియాలోనూ సందడి మొదలైంది.
డిఫెండింగ్ ఛాంపియన్ రాయల్ ఛాలెంజర్స్ బెంగళూరు జట్టుతో కలిసేందుకు కోహ్లీ బెంగళూరుకు చేరుకున్నాడు. ఈ నెల 28 నుంచి ప్రారంభం కానున్న ఐపీఎల్ సీజన్‌కు సిద్ధమవుతున్న జట్టు ఇప్పటికే ప్రాక్టీస్‌లను ముమ్మరం చేసింది. టైటిల్‌ను మరోసారి కాపాడుకోవడమే లక్ష్యంగా ఆర్సీబీ బరిలోకి దిగుతోంది.
కోహ్లీ రాకను ప్రత్యేకంగా చూపిస్తూ ఆర్సీబీ సోషల్ మీడియాలో ఒక క్రియేటివ్ వీడియోను విడుదల చేసింది. విమానాశ్రయం నుంచి నగరానికి వస్తున్న కోహ్లీ దృశ్యాలకు ప్రత్యేక నేపథ్య సంగీతాన్ని జతచేసి అభిమానులను ఆకట్టుకుంది. ముఖ్యంగా ట్రాఫిక్ సిగ్నల్ వద్ద కనిపించిన జెర్సీ నంబర్ 18 ఫ్యాన్స్‌ను మరింత ఎగ్జైట్ చేసింది. “అతను వస్తున్నాడని తెలుసుకోవడానికి చూడాల్సిన అవసరం లేదు… తేదీనే చెబుతోంది” అనే సందేశంతో వీడియో వైరల్‌గా మారింది.
కోహ్లీ రాకతో అభిమానులు సోషల్ మీడియాలో కామెంట్లతో హోరెత్తిస్తున్నారు. మార్చి 18న ‘నంబర్ 18’ అయిన కోహ్లీ తన గడ్డపైకి అడుగుపెట్టాడంటూ అభిమానులు తమ ఆనందాన్ని వ్యక్తం చేస్తున్నారు. గత సీజన్‌లో జట్టు విజయంలో కోహ్లీ కీలక పాత్ర పోషించిన విషయం తెలిసిందే. అతని బ్యాటింగ్ ఫామ్ ఈ సీజన్‌లోనూ కొనసాగాలని అభిమానులు ఆశిస్తున్నారు.
ఐపీఎల్ చరిత్రలో అత్యధిక పరుగులు చేసిన బ్యాటర్లలో కోహ్లీ అగ్రస్థానంలో నిలిచాడు. అతని అనుభవం, స్థిరత్వం జట్టుకు కీలకంగా మారనుంది. మరోసారి ట్రోఫీ గెలవాలంటే కోహ్లీ ప్రదర్శన కీలకం అవుతుందని క్రికెట్ విశ్లేషకులు భావిస్తున్నారు.
ఈ సీజన్‌లో ఆర్సీబీ తన తొలి మ్యాచ్‌ను స్వగృహమైన చిన్నస్వామి స్టేడియంలో ఆడనుంది. ప్రారంభ మ్యాచ్‌లో సన్‌రైజర్స్ హైదరాబాద్తో తలపడనుంది. ఆ తర్వాత ఏప్రిల్ 5న చెన్నై సూపర్ కింగ్స్తో కీలక పోరు ఉండనుంది. ఈ మ్యాచ్‌ల కోసం అభిమానులు ఇప్పటినుంచే ఆసక్తిగా ఎదురుచూస్తున్నారు.
