సమంత నటించిన ఓ బేబీ సినిమాలో బేబీ పాత్రలో నటించిన లక్ష్మి( అసలు పేరు యర్రగుడిపాడి వెంకట మహాలక్ష్మి) ఎంత గొప్ప నటిమణో ప్రత్యేకంగా చెప్పనక్కర్లేదు. 67 ఏళ్ళ వయసులో కూడా కుర్ర హీరోయిన్ సమంత కంటే ఎంతో చురుకుగా, అత్యద్భుతంగా నటించి తెలుగు ప్రేక్షకులను మంత్రముగ్ధుల్ని చేసారు. బాలసుబ్రహ్మణ్యం సరసన మిథునం సినిమాలో ఆమె నటించిన బుచ్చి లక్ష్మి పాత్ర ప్రేక్షకుల మదిలో ఎప్పటికీ చెక్కు చెదరకుండా నిలిచి పోతుందంటే అతిశయోక్తి కాదు. తమిళం, మలయాళం, హిందీ, కన్నడ, తెలుగు వంటి పలు భాషలలో అద్భుతంగా నటించి ఎన్నో అవార్డులను సొంతం చేసుకున్న లక్ష్మి భారతీయ సినీ ప్రపంచంలో ఒక పెద్ద సంచలనం అని చెప్పుకోవచ్చు. ఉత్తమ నటీమణిగా ఏడు ఫిలింఫేర్ అవార్డులను అందుకున్న ఏకైక నటి లక్ష్మి తన 15 ఏళ్ళ వయసులోనే సినిమా రంగంలో అరంగేట్రం చేశారు. 1991లో శ్రీవల్లి సినిమాలో ఆమె ఒక చిన్న క్యారెక్టర్ చేశారు. తదనంతరం 1968లో జీవనాంసాం అనే ఓ తమిళ చిత్రం ద్వారా పూర్తి స్థాయిలో నటీమణి అయ్యారు. ఎటువంటి చాలెంజింగ్ పాత్రలలో అయినా నటించేందుకు నటిమణి లక్ష్మి ఎప్పుడూ సిద్ధంగా ఉంటారు. తక్కువ పారితోషకం తో సరిపెట్టే ప్రయోగాత్మక చిత్రాల్లో నటించే అవకాశాలు వచ్చినా… ఏనాడు ఆమె తిరస్కరించలేదట. ఒకానొక సినిమాలో వేశ్య పాత్రలో బ్రహ్మాండంగా నటించి తన రక్తంలో అసలైన నటనా ప్రతిభ ఉందని చెప్పకనే చెప్పేశారు.

నిజం ఏమిటంటే ఆమె తండ్రి యర్రగుడిపాటి వరదా రావు( వై.వి. రావు) ప్రముఖ నటుడు దర్శకుడు కాగా… ఆమె తల్లి కుమారి రుక్మిణి ప్రముఖ తమిళ నటిమణి. ఈ విధంగా సినిమా వాతావరణంలో పుట్టి పెరిగిన లక్ష్మి అద్భుతమైన నటీమణిగా ఎదగడం అనేది పెద్ద ఆశ్చర్యకరమైన విషయం కాదు. 1968 లో వచ్చిన బాంధవ్యాలు సినిమా నుండి మొన్న విడుదల అయిన ఓ బేబీ సినిమా వరకు గొప్ప నటీమణిగా కొనసాగిన లక్ష్మీ లో ఒక ప్రత్యేకత ఉంటుంది. అదేంటంటే దర్శకుడు ఒక డైలాగ్ ఇలా చెప్పాలి అని సూచిస్తే… అలా కాదు ఇలా చెప్తే ఇంకా బాగుంటుందేమో అని ఆమె తన పాత్రని చక్కదిద్దుకునే వారట. ఆమెకు ఇచ్చిన పాత్రని కూలంకషంగా పరిశీలించి ఇలాంటి పాత్రలో ఇలా నటిస్తే బాగుంటుంది అని ఎస్.వి.రంగారావు తరహాలో మైండ్ లో ఫిక్స్ అయ్యి నటించేవారట. అందుకే ఆమె ఏ పాత్ర వేసినా అత్యంత సహజంగా చాలా చక్కగా వెండితెరపై పండుతుంది. కేవలం సినిమా జీవితం లో మాత్రమే కాదు వ్యక్తిగత జీవితంలో కూడా ఆమె తీసుకున్న నిర్ణయాలు అందరినీ ఆశ్చర్యపరిచాయి.

1974లో ఆమె నటించిన డిక్కత్ర పార్వతి సినిమా విడుదల అయి సూపర్ హిట్ గా నిలిచిన సమయంలో లక్ష్మీ తన భర్త భాస్కర్ కి విడాకులు ఇచ్చి పెద్ద సంచలనం సృష్టించారు. తన పదిహేనేళ్ళ వయసులోనే పెద్దలు కుదిర్చిన భాస్కర్ ని పెళ్లి చేసుకున్న లక్ష్మి కేవలం ఐదు సంవత్సరాలు సంసారం చేసి విడాకులు తీసుకున్నారు. 1974 మే 10వ తేదీన విడుదలైన ఛట్ఠకారి అనే మలయాళం సినిమా లో లక్ష్మి జూలీ అనే ఆంగ్లో-ఇండియన్ పాత్రలో నటించారు. ఈ సినిమాలో జూలీ హిందూ కుటుంబంలో పుట్టి పెరిగిన శశి( మోహన్ శర్మ)ని ప్రేమిస్తుంది. ఐతే ఈ రొమాంటిక్ మలయాళం సినిమా లో నటించిన లక్ష్మి మోహన్ శర్మ సెట్స్ లో బాగా మాట్లాడుకునేవారు. కాలక్రమేణా వారిద్దరి మధ్య మంచి స్నేహం, ఆపై ప్రేమ, తర్వాత పెళ్లికి దారి తీశాయి. మోహన్ శర్మ కూడా లక్ష్మీ లాగానే విభిన్నమైన కథాంశంతో తెరకెక్కిన సినిమాలో నటించేవారు. మలయాళంలో ఇతను చాలా గొప్ప నటుడు. అయితే లక్ష్మీ ఇతడిని 1975 సంవత్సరంలో పెళ్లి చేసుకుని 1980లో వదిలేశారు. అప్పట్లో ఈమె రెండోసారి విడాకులు తీసుకోవడం సినీపరిశ్రమలో పెద్ద దుమారమే రేపింది. ఈమెను చులకనగా చూస్తూ అపహాస్యం చేస్తూ మాట్లాడేవారు బాగా పెరిగిపోయారు. కానీ ఆమె మాత్రం ఎవరి మాటలు పట్టించుకోకుండా తన కిష్టమైన నిర్ణయాలు తీసుకుంటూ జీవితంలో ముందుకు కొనసాగేవారు.

ఏడు సంవత్సరాలు గడిచిన తరువాత ఆమె మళ్ళీ శివచంద్రన్ అనే ఒక ప్రముఖ నటుడి ని వివాహమాడారు. ఆమె మూడో పెళ్లి చేసుకోవడంతో యావత్ సినిమా ప్రపంచంతో పాటు ప్రేక్షకులు కూడా ఒక్కసారిగా విస్తుపోయారు. అయితే లక్ష్మి మూడు పెళ్లిళ్లు చేసుకోవడానికి గల కారణం ఏమిటి అని అడిగితే… మగాళ్ళు చూపించే గర్వం, అధికార తత్వం అని ఆమె చెబుతారు. నువ్వు తక్కువ,నేను ఎక్కువ అందుకే నువ్వు నా మాటే వినాలి అని భర్త చెబుతుంటే తనకి అస్సలు నచ్చకపోయేదట. అందుకే తన అహంకారి భర్తలకు విడాకులు ఇచ్చేసి తనను సమానంగా చూసుకునే శివచంద్రన్ ని పెళ్లి చేసుకున్నారు. ఏదేమైనా తన సినీ జీవితం, వ్యక్తిగత జీవితం రెండూ కూడా పెద్ద సంచలనాలే అని చెప్పుకోవచ్చు.

LEAVE A REPLY

Please enter your comment!
Please enter your name here