Ten Rupee Coin: ఏదైనా కొనుగోలు కోసం దుకాణానికి వెళ్లి.. సరుకులు తీసుకున్న తర్వాత రూ.10 నాణెం ఇస్తే.. ఇది చెల్లదు వేరేది ఇవ్వండి అనడం మనం ఎన్నోసార్లు చూశాం. నిత్య జీవితంలో చాలా మందికి ఈ పరిణామం ఎదురయ్యే ఉంటుంది.
రూ. 10 నాణేం అసలు చెల్లుతుందా.. చెల్లదా..? అనే సందేహాల నడుమ దీన్ని లావాదేవీల్లో ఉపయోగించని పరిస్థితి ఎదురైంది. ఆర్బీఐ చాలా సార్లు దీనిపై అవగాహన కల్పించినా కూడా.. రూ. 10 నాణేం వాడకంపై ప్రజలకు అనుమానాలు ఉన్నాయి.
అయితే తాజాగా ఇటీవల ఈ అంశం లోక్ సభలో ప్రస్తావనకు వచ్చింది. తమిళనాడుకు చెందిన ఎంపీ ఏ. విజయ్ కుమార్ అసలు రూ. 10 నాణెం చెల్లుతుందా.. లేదా..? అని రాజ్యసభలో కేంద్రాన్ని ప్రశ్నించారు. కాగా దీనికి కేంద్ర ఆర్థిక సహాయ మంత్రి పంకజ్ చౌదరి వ్రాతపూర్వకంగా సమాధానం ఇచ్చారు.
అనుమానాలను తొలగించేందుకు ఆర్బీఐ..
రూ. 10 నాణెంపై స్పందించారు. ప్రభుత్వ ఆధ్వర్యంలో ముద్రించబడి, భారతీయ రిజర్వ్ బ్యాంక్ ద్వారా పంపిణీ చేయబడిన రూ. 10 నాణేలు చట్టబద్ధం అయినవని స్పష్టం చేశారు. అన్ని లావాదేవీలకు చట్టపరమైన టెండర్ గా ఉపయోగించుకోవచ్చని తెలిపారు. రూ.10 నాణెంపై ప్రజలకు అపోహలు, అనుమానాలు ఉన్నాయని, ప్రజల నుంచి ఫిర్యాదులు కూడా వచ్చాయని కేంద్రమంత్రి అన్నారు. అయితే వీటిని ఎప్పటికప్పుడు పరిష్కరించేందుకు అనుమానాలను తొలగించేందుకు ఆర్బీఐ పత్రికా ప్రకటనలు జారీ చేస్తుందని వివరణ ఇచ్చారు. రూ. 10 నాణెంపై ఎలాంటి అనుమానాలు లేకుండా లీగల్ టెండర్ గా అంగీకరించాలని కోరారు. ఆర్బీఐ రూ.10 నాణెం మొత్తం 14 డిజైన్లు చెల్లుబాటు అవుతాయని , లావాదేవీలకు చట్టబద్ధమైన టెండర్ గా అంగీకరించాలని చెప్పారు. ఆర్బీఐ తొలిసారిగా రూ. 10 కాయిన్ను 2005లో ప్రవేశపెట్టింది.
