పెరుగు తింటే షుగర్ పెరుగుతుందా..? మజ్జిగ, పెరుగు.. షుగర్ రోగులకు ఏది బెటర్..?

మధుమేహం ఉన్నవారు ఆహార విషయంలో ఎంతో జాగ్రత్తగా ఉండాల్సి వస్తుంది. ఏది తినాలి, ఏది దూరంగా పెట్టాలి అనే సందేహాలు చాలామందిలో ఉంటాయి. ముఖ్యంగా పెరుగు విషయంలో అనేక అపోహలు వినిపిస్తుంటాయి. షుగర్ ఉన్నవారు పెరుగు తింటే చక్కెర స్థాయిలు పెరుగుతాయని కొందరు భావిస్తారు. కానీ ఆరోగ్య నిపుణుల అభిప్రాయం మాత్రం భిన్నంగా ఉంది. సరైన విధంగా తీసుకుంటే పెరుగు మధుమేహ రోగులకు మేలు చేస్తుందని వారు చెబుతున్నారు.

పెరుగులో ఉండే మంచి బ్యాక్టీరియా జీర్ణవ్యవస్థ పనితీరును మెరుగుపరచడంలో సహాయపడుతుంది. శరీరంలో జీర్ణక్రియ సక్రమంగా జరిగితే రక్తంలో చక్కెర స్థాయిల నియంత్రణ కూడా కొంతవరకు సులభమవుతుంది. అలాగే పెరుగులో ప్రోటీన్లు, కాల్షియం, విటమిన్లు ఉండటంతో ఇది శరీరానికి అవసరమైన పోషకాలను అందిస్తుంది. ముఖ్యంగా తక్కువ గ్లైసెమిక్ ఇండెక్స్ ఉండటం వల్ల పెరుగు తిన్న వెంటనే షుగర్ లెవెల్స్ ఒక్కసారిగా పెరిగే అవకాశం తక్కువగా ఉంటుందని నిపుణులు చెబుతున్నారు.

అయితే ప్రతి రకం పెరుగు మధుమేహ రోగులకు మంచిదని అనుకోవద్దు. ప్రస్తుతం మార్కెట్లో లభిస్తున్న ఫ్లేవర్డ్ యోగర్ట్‌లు, స్వీట్ పెరుగుల్లో అధికంగా చక్కెర, కృత్రిమ రుచులు కలిపి ఉంటాయి. ఇవి రక్తంలో గ్లూకోజ్ స్థాయిలను వేగంగా పెంచే ప్రమాదం ఉంది. అందుకే ఇంట్లో తయారుచేసిన తాజా పెరుగును మాత్రమే తీసుకోవడం ఉత్తమమని వైద్యులు సూచిస్తున్నారు.

మధుమేహంతో బాధపడుతున్నవారిలో అధిక బరువు కూడా సాధారణ సమస్యగా కనిపిస్తుంది. పెరుగు తీసుకోవడం వల్ల కడుపు నిండిన భావన ఎక్కువసేపు ఉంటుంది. దీంతో తరచూ ఆకలి వేయడం తగ్గి, అనవసరంగా తినే అలవాటు తగ్గే అవకాశం ఉంటుంది. బరువును నియంత్రణలో ఉంచుకోవడం ద్వారా షుగర్ లెవెల్స్‌ను కూడా అదుపులో ఉంచవచ్చని నిపుణులు చెబుతున్నారు.

పెరుగు తినే విధానంలో కూడా కొన్ని జాగ్రత్తలు అవసరం. చాలామంది రుచికోసం పెరుగులో పంచదార కలుపుకుని తింటారు. ఇది మధుమేహ రోగులకు మంచిది కాదు. బదులుగా చిటికెడు జీలకర్ర పొడి, మిరియాల పొడి కలిపి తీసుకుంటే రుచితో పాటు జీర్ణక్రియకు కూడా మేలు జరుగుతుంది. అలాగే కీరదోసకాయ, టమోటా, ఉల్లిపాయ ముక్కలతో రాయితా తయారు చేసి తీసుకుంటే ఫైబర్ కూడా శరీరానికి అందుతుంది.

మధ్యాహ్న భోజన సమయంలో పెరుగు తీసుకోవడం మంచిదని ఆరోగ్య నిపుణులు సూచిస్తున్నారు. రాత్రి సమయంలో ఎక్కువగా తీసుకుంటే కొందరికి జీర్ణ సమస్యలు తలెత్తే అవకాశం ఉంటుంది. పెరుగు బదులుగా మజ్జిగను కూడా ఆహారంలో భాగం చేసుకోవచ్చు. వేసవిలో మజ్జిగ శరీరాన్ని చల్లగా ఉంచడమే కాకుండా డీహైడ్రేషన్ సమస్యను తగ్గించడంలో సహాయపడుతుంది.

మధుమేహం ఉన్నవారు పూర్తిగా పెరుగు మానేయాల్సిన అవసరం లేదని నిపుణులు చెబుతున్నారు. సరైన పరిమాణంలో, చక్కెర లేకుండా, తాజా పెరుగును తీసుకుంటే అది ఆరోగ్యానికి మేలు చేస్తుందని సూచిస్తున్నారు. అయితే వ్యక్తిగత ఆరోగ్య పరిస్థితిని బట్టి ఆహారంలో మార్పులు చేసుకునే ముందు వైద్యుల సలహా తీసుకోవడం మంచిదని చెబుతున్నారు.