సోషల్ మీడియాలో ప్రతిరోజూ ఎన్నో వీడియోలు వైరల్ అవుతున్నా, కొన్ని మాత్రం మనసును తాకే ప్రత్యేకమైన భావోద్వేగాన్ని కలిగిస్తాయి. అలాంటి ఓ హృదయాన్ని హత్తుకునే వీడియో ప్రస్తుతం నెటిజన్లను ఆకట్టుకుంటోంది. జంతువుల మధ్య కనిపించిన అపూర్వమైన అనుబంధం అందరినీ ఆశ్చర్యానికి గురిచేస్తోంది.
వైరల్ అవుతున్న ఈ వీడియోలో ఓ కుక్క తన నోటిలో రొట్టె ముక్కను పట్టుకుని నెమ్మదిగా ముందుకు నడుస్తూ కనిపిస్తుంది. ఆ కుక్క ఎక్కడికో లక్ష్యంగా వెళ్తున్నట్టుగా స్పష్టంగా తెలుస్తుంది. కొద్దిసేపటికి అది ఒక ఆవు దగ్గరకు చేరుకుని, తన నోటిలో ఉన్న రొట్టెను ఆవు ముందు ఉంచుతుంది. ఆ తర్వాత ఎలాంటి ఆశ లేకుండా అక్కడి నుంచి నిశ్శబ్దంగా వెళ్లిపోవడం వీడియోలో కనిపించే అత్యంత హృదయ స్పర్శమైన క్షణంగా మారింది.
ఈ దృశ్యాన్ని చిత్రీకరించిన వ్యక్తి, కుక్కను అనుసరిస్తూ తీసిన వీడియో అని తెలిపాడు. తన కళ్లముందు జరిగిన ఈ సంఘటన తనను భావోద్వేగానికి గురిచేసిందని కూడా పేర్కొన్నాడు. ప్రస్తుతం ఈ వీడియో సోషల్ మీడియాలో వేగంగా పాపులర్ అవుతూ, వేలాది మంది హృదయాలను కదిలిస్తోంది.
ఈ వీడియోపై నెటిజన్లు విభిన్నంగా స్పందిస్తున్నారు. “ఇదే నిజమైన స్నేహం”, “నిస్వార్థ ప్రేమ అంటే ఇదే” అంటూ చాలా మంది కామెంట్లు చేస్తున్నారు. మరికొందరు, జంతువుల దగ్గర నుంచే మనిషి ప్రేమ, సహాయం వంటి విలువలను నేర్చుకోవాలని సూచిస్తున్నారు. కొందరు అయితే “జాతి వైరం అన్నది మనుషులకే… జంతువులకు కాదు” అంటూ తమ అభిప్రాయాలను వ్యక్తం చేస్తున్నారు.
మొత్తంగా ఈ చిన్న వీడియో, మనిషి మరిచిపోతున్న అనుబంధాలను గుర్తు చేస్తూ, నిస్వార్థ ప్రేమకు జంతువులే అసలైన ఉదాహరణ అన్న భావనను మరోసారి ముందుకు తీసుకొచ్చింది.
