సినీ ఇండస్ట్రీలో ఒకప్పుడు గ్లామర్ పాత్రలతో సంచలనం సృష్టించిన నటి షకీలా తాజాగా దివంగత నటి సిల్క్ స్మితతో తనకున్న అనుభవాలను గుర్తుచేసుకున్నారు. ఓ ఇంటర్వ్యూలో మాట్లాడుతూ షూటింగ్ సమయంలో జరిగిన ఒక సంఘటనను వెల్లడించి అందరినీ ఆశ్చర్యానికి గురి చేశారు. సిల్క్ స్మిత గురించి బయట ప్రచారంలో ఉన్న కొన్ని వార్తల్లో నిజం ఉందని, కానీ వాటి వెనుక అసలు విషయం చాలా మందికి తెలియదని చెప్పారు.
షకీలా మాట్లాడుతూ.. తాను సినీ ప్రయాణం ప్రారంభించిన తొలి రోజుల్లోనే సిల్క్ స్మితతో కలిసి నటించే అవకాశం వచ్చిందన్నారు. ఆ సమయంలో సిల్క్ స్మిత ఇప్పటికే స్టార్ హీరోయిన్గా వెలుగొందుతుండగా, తాను చిన్న పాత్రలో నటించానని తెలిపారు. ఆమెతో కలిసి పని చేసిన రోజులు ఇప్పటికీ గుర్తున్నాయని చెప్పారు. బయటకు కఠినంగా కనిపించినా, వ్యక్తిగతంగా మాత్రం సిల్క్ స్మిత చాలా సున్నిత మనసున్న వ్యక్తి అని పేర్కొన్నారు.
ఒక సినిమాలో సన్నివేశం కోసం సిల్క్ స్మిత తనను కాలితో తన్నాల్సి వచ్చిందని, అయితే ఆ షాట్లో ఆమె నిజంగానే గట్టిగా తన్నడంతో తాను సెట్లోనే కన్నీళ్లు పెట్టుకున్నానని షకీలా వెల్లడించారు. డైరెక్టర్ ముందు చాలా అవమానంగా అనిపించిందని, ఆ క్షణం ఇప్పటికీ మర్చిపోలేనని అన్నారు. అయితే షూటింగ్ పూర్తయ్యాక సిల్క్ స్మిత తన దగ్గరకు వచ్చి ఓదార్చిందని, “ఒక్క టేక్లో సీన్ పూర్తి కావాలనే అలా చేశాను” అంటూ వివరణ ఇచ్చిందని గుర్తుచేసుకున్నారు.
అంతేకాదు, షూటింగ్ సమయంలో సిల్క్ స్మిత తనకు చిన్న చిన్న సూచనలు కూడా చేసేదని షకీలా చెప్పారు. కొన్నిసార్లు తనకు చాక్లెట్లు తీసుకువచ్చి ఇచ్చేదని, కొత్తగా ఇండస్ట్రీలోకి వచ్చిన తనను ప్రోత్సహించేదని తెలిపారు. ఆమె వ్యక్తిత్వాన్ని చాలా మంది తప్పుగా అర్థం చేసుకున్నారని, కానీ తనకు తెలిసిన సిల్క్ స్మిత మాత్రం ఎంతో ప్రత్యేకమని అన్నారు.
సిల్క్ స్మిత జీవించి ఉండి ఉంటే ఇండస్ట్రీలో ఇంకా ఎన్నో అద్భుతాలు చేసేదని షకీలా అభిప్రాయపడ్డారు. ఆమె మరణం తర్వాతే తనకు గుర్తింపు వచ్చిందని, సిల్క్ స్మిత స్థానం ఎప్పటికీ ప్రత్యేకంగానే ఉంటుందని పేర్కొన్నారు. ప్రస్తుతం షకీలా చేసిన ఈ వ్యాఖ్యలు సోషల్ మీడియాలో వైరల్గా మారాయి.
