మన రోజువారీ జీవితంలో స్నానం అనేది కేవలం శరీర శుభ్రత కోసం చేసే చర్యగా భావిస్తారు. కానీ హిందూ ధర్మ గ్రంథాల్లో స్నానానికి మరింత లోతైన ఆధ్యాత్మిక అర్థం ఉందని జ్యోతిష్యులు చెబుతున్నారు. గరుడ పురాణంలో స్నానాన్ని కేవలం నీటితో చేసే ప్రక్రియగా కాకుండా, మనసు, శరీరం, ఆత్మ శుద్ధికి సంబంధించిన అనేక విధాలుగా వివరించారు.
జ్యోతిష్యుల అభిప్రాయం ప్రకారం స్నానం చేయడం సాధ్యం కాని పరిస్థితుల్లో కూడా పుణ్యం పొందే మార్గాలు ఉన్నాయని శాస్త్రాలు పేర్కొంటున్నాయి. వీటిని వివిధ సందర్భాల్లో “స్నాన విధులు”గా విభజించారు.
అందులో మొదటిగా చెప్పేది “బ్రహ్మ స్నానం”. నీరు అందుబాటులో లేకపోయినా, దర్భలను నీటిలో ఉంచి ఆ నీటిని శిరస్సుపై చల్లుకుంటే ఆచారపరంగా స్నానం చేసిన ఫలితం లభిస్తుందని చెబుతారు.
“భస్మ స్నానం” కూడా మరో ముఖ్యమైన విధానంగా పేర్కొంటారు. పవిత్ర భస్మాన్ని శిరస్సుపై ధరించడం ద్వారా శుద్ధి పొందినట్లుగా భావిస్తారు. ఇది సంప్రదాయంగా గోమయం ఆధారంగా తయారైన భస్మంగా చెప్పబడుతుంది.
“దివ్య స్నానం”లో సూర్య కిరణాల సాక్షిగా సూర్య నామాలను జపించడం ద్వారా ఆధ్యాత్మిక శుద్ధి కలుగుతుందని వివరిస్తారు. అలాగే నదులు, సముద్రాల్లో చేసే స్నానాన్ని “వారుణ స్నానం”గా పేర్కొంటారు.
అనారోగ్యం లేదా ఇతర కారణాలతో స్నానం చేయలేని వారికి “యోగిక స్నానం”గా భగవన్నామ స్మరణను సూచిస్తారు. ఇక “గోధూళి స్నానం”లో ఆవుల గిట్టల నుంచి వచ్చే ధూళి శరీరంపై పడటం కూడా పవిత్రంగా భావిస్తారు.
గరుడ పురాణంలో పేర్కొన్న ఈ స్నాన విధానాలు శారీరక శుభ్రతతో పాటు మనసు శాంతికి కూడా సంబంధించినవని జ్యోతిష్యులు అభిప్రాయపడుతున్నారు. వీటి ద్వారా పాప విముక్తి, పుణ్యఫలం లభిస్తుందని సంప్రదాయ విశ్వాసం ఉంది.
