నేటి జీవనశైలిలో మార్పులు, ఆహారపు అలవాట్ల కారణంగా చాలా మందిని వేధిస్తున్న సమస్యల్లో యూరిక్ యాసిడ్ ఒకటి. వయసుతో సంబంధం లేకుండా యువతలో కూడా ఈ సమస్య పెరుగుతోంది. శరీరంలో ప్యూరిన్లు అరిగే ప్రక్రియలో ఏర్పడే ఈ వ్యర్థ పదార్థం సాధారణంగా మూత్రం ద్వారా బయటకు వెళ్లాలి. కానీ కిడ్నీలు సరిగా పనిచేయకపోతే ఇది రక్తంలో పేరుకుపోయి చిన్న స్ఫటికాలుగా మారుతుంది. ఈ స్ఫటికాలు కీళ్ల వద్ద చేరితే తీవ్రమైన నొప్పులకు దారితీస్తాయి.
యూరిక్ యాసిడ్ స్థాయిలు పెరిగినప్పుడు కొన్ని స్పష్టమైన సంకేతాలు కనిపిస్తాయి. ముఖ్యంగా కాలి బొటనవేలు, మోకాళ్లు లేదా మడమల వద్ద అకస్మాత్తుగా వాపు, నొప్పి మొదలవుతుంది. ఈ నొప్పి చాలా వేధించేలా ఉండటంతో నడవడానికే ఇబ్బంది కలిగిస్తుంది. కొన్నిసార్లు కీళ్లు ఎర్రగా మారి మంట కూడా అనిపిస్తుంది. ఈ లక్షణాలను నిర్లక్ష్యం చేస్తే పరిస్థితి మరింత తీవ్రమయ్యే అవకాశం ఉంది.
ఇంకా, కిడ్నీలలో యూరిక్ యాసిడ్ స్ఫటికాలు పేరుకుపోతే నడుము లేదా పక్కటెముకల వద్ద తీవ్రమైన నొప్పి కనిపించవచ్చు. మూత్రం విసర్జన సమయంలో మంట, రంగు మారడం లేదా దుర్వాసన రావడం వంటి లక్షణాలు కూడా సమస్య తీవ్రతను సూచిస్తాయి. ఎప్పుడూ అలసటగా అనిపించడం, బరువు ఆకస్మికంగా పెరగడం వంటి మార్పులు కూడా శరీరంలో ఏదో తేడా జరుగుతోందని సంకేతాలివే.
ఈ సమస్యను నియంత్రించేందుకు జీవనశైలిలో మార్పులు చాలా అవసరం. రోజూ తగినంత నీరు తాగడం కిడ్నీల పనితీరును మెరుగుపరుస్తుంది. మటన్, సముద్ర ఆహారం వంటి ప్యూరిన్ అధికంగా ఉండే పదార్థాలను తగ్గించడం మంచిది. అలాగే చక్కెర పానీయాలు, ప్రాసెస్డ్ ఫుడ్స్ తగ్గిస్తే శరీరంపై ఒత్తిడి తగ్గుతుంది.
విటమిన్-సి ఎక్కువగా ఉండే పండ్లు తీసుకోవడం యూరిక్ యాసిడ్ నియంత్రణకు సహాయపడుతుంది. రోజువారీ వ్యాయామం, బరువు నియంత్రణ కూడా ముఖ్యమే. మద్యం అలవాటు ఉంటే తగ్గించడం లేదా మానేయడం కిడ్నీలకు ఉపశమనాన్ని ఇస్తుంది. సమస్య ఎక్కువగా అనిపిస్తే స్వయంగా మందులు వాడకుండా వైద్యులను సంప్రదించడం అవసరం.
మొత్తంగా, చిన్న చిన్న లక్షణాలను నిర్లక్ష్యం చేయకుండా ముందుగానే జాగ్రత్తలు తీసుకుంటే యూరిక్ యాసిడ్ సమస్యను సులభంగా అదుపులో పెట్టుకోవచ్చు. సమతుల ఆహారం, చురుకైన జీవనశైలి పాటించడం ద్వారా ఆరోగ్యాన్ని కాపాడుకోవడం సాధ్యమే.
