పిల్లల ఎదుగుదలకు పాలు, గుడ్లు ఎంతో ఉపయోగకరమని చాలా కాలంగా భావిస్తున్నారు. అందుకే చాలామంది తల్లిదండ్రులు రోజూ పిల్లలకు గుడ్లు, పాలు తప్పనిసరిగా ఇస్తుంటారు. అయితే ఇవే పూర్తిస్థాయి పోషకాహారం కాదని, ముఖ్యంగా ఎదుగుదల దశలో ఉన్న పిల్లలకు మరింత సమతుల్య ఆహారం అవసరమని ఆరోగ్య నిపుణులు చెబుతున్నారు.
గుడ్లు, పాలలో ప్రోటీన్, కాల్షియం, విటమిన్లు ఉన్నప్పటికీ, పెద్దవుతున్న పిల్లల శరీర అవసరాలకు ఇవి మాత్రమే సరిపోవని నిపుణులు సూచిస్తున్నారు. పిల్లల శరీర బరువు, వయస్సు పెరిగే కొద్దీ వారికి ఎక్కువ ప్రోటీన్, ఖనిజాలు, ఆరోగ్యకరమైన కొవ్వులు అవసరమవుతాయని చెబుతున్నారు. సరైన పోషకాహారం అందకపోతే హార్మోన్ అసమతుల్యతలు, థైరాయిడ్ సమస్యలు, PCOD వంటి ఆరోగ్య సమస్యలు వచ్చే అవకాశాలు ఉంటాయని హెచ్చరిస్తున్నారు.
ఇటీవల చిన్న వయస్సులోనే పిల్లల్లో హార్మోన్ సంబంధిత సమస్యలు పెరుగుతున్నాయని వైద్యులు చెబుతున్నారు. ముఖ్యంగా అమ్మాయిల్లో రుతుక్రమ సమస్యలు, మొటిమలు, PCOD వంటి సమస్యలు కనిపిస్తుండగా, అబ్బాయిల్లో కూడా శారీరక ఎదుగుదలపై ప్రభావం పడుతున్నట్లు నిపుణులు సూచిస్తున్నారు. దీనికి సరైన పోషకాహారం లేకపోవడం కూడా ఒక కారణమని చెబుతున్నారు.
ఆరోగ్య నిపుణుల అభిప్రాయం ప్రకారం, పిల్లల ఆహారంలో కేవలం గుడ్లు, పాలు మాత్రమే కాకుండా ఇతర ప్రోటీన్ ఆహారాలు కూడా ఉండాలి. మొలకెత్తిన ధాన్యాలు, వేరుశెనగలు, పప్పులు, గింజలు, ఆకుకూరలు వంటి పదార్థాలను ఆహారంలో చేర్చడం వల్ల శరీరానికి అవసరమైన పోషకాలు అందుతాయని సూచిస్తున్నారు. ముఖ్యంగా పుచ్చకాయ గింజలు, గుమ్మడి గింజలు, పొద్దుతిరుగుడు గింజలు, బాదం వంటి డ్రై ఫ్రూట్స్ మరియు సీడ్స్ శరీరానికి మంచి ప్రోటీన్, మినరల్స్ అందిస్తాయని చెబుతున్నారు.
మధ్యాహ్న భోజనంలో పప్పులు, ఆకుకూరలు ఎక్కువగా ఉండేలా చూసుకోవాలని నిపుణులు సూచిస్తున్నారు. అలాగే పిల్లలకు జంక్ ఫుడ్, అధికంగా ప్రాసెస్డ్ ఫుడ్ ఇవ్వడం తగ్గిస్తే ఆరోగ్య సమస్యలు తగ్గే అవకాశం ఉందని చెబుతున్నారు. సరిపడా నిద్ర, వ్యాయామం కూడా పిల్లల ఎదుగుదలలో కీలక పాత్ర పోషిస్తాయని పేర్కొంటున్నారు.
పిల్లల ఆరోగ్యం విషయంలో ఏవైనా మార్పులు కనిపించినా, ఎదుగుదల సరిగా లేకపోయినా వైద్యులను సంప్రదించడం మంచిదని నిపుణులు సూచిస్తున్నారు. ఇంటర్నెట్లో వచ్చే సమాచారం ఆధారంగా మాత్రమే ఆహారంలో పెద్ద మార్పులు చేయకుండా, అవసరమైతే న్యూట్రిషనిస్టులు లేదా వైద్యుల సలహా తీసుకోవడం ఉత్తమమని చెబుతున్నారు.
